Rosemary全力搏殺為生B鋪路
14歲出道的名模Rosemary，在模特兒圈子打滾將近20年，對時裝潮流有着一定的認知，她亦深明模特兒生涯有限，所以積極開展另一事業，兩年前開始發展網上銷售潮流物品的生意，為將來做好準備。Rosemary今年年尾將下嫁中印籍未婚夫Jason，她坦言婚後想盡快有小朋友，所以這段時間是衝刺期，就算忙得不可開交，亦希望事業盡快上軌道，不影響生B計劃。
Rosemary與未婚夫Jason婚期一拖再拖，現定於年尾舉行，提起Jason她分外雀躍，感謝對方一直以來的關懷與無微不至，一早已認定對方是她的Mr. Right：「佢好好，係100分嘅perfect guy，有風度、有愛心。我哋嘅相處之道就係互相分享，大家對大家毫不保留，乜都傾乜都可以講，佢係我認定要嫁嘅人。（依家婚期定咗未？）仲未，Jason好忙，成日不停飛，婚禮係兩個人嘅事，要有時間慢慢坐低一齊商量，我都知佢好大壓力，畀多啲時間我哋，慢慢籌備，唔使咁急，我想喺秋天，因為天氣好，依家一有時間我哋就會一齊去旅行，跟住影相，我想有多啲兩個人嘅故事、美好嘅回憶，Jason係一個唔鍾意影相嘅人，但佢都好就我。」
搜羅名貴配飾
Rosemary與Jason兩人除了籌備婚禮，同樣亦為自己的工作加緊努力，Rosemary兩年前投資數百萬元與兩位朋友Bobo Rok及Timothy Kau發展網上商店生意，她謂單是概念及籌備已花了一年時間，去年才開始正常運作，她說：「個網主要係賣啲名貴嘅手袋、首飾、手錶等等，我哋喺世界各地搜羅啲牌子，遲啲仲希望可以賣自己嘅品牌，其實早前去咗意大利，同個品牌傾咗，會合作設計屬於我自己嘅手袋，應該今年會推出。（投資咗幾多錢？100萬？）多好多，數字就唔好講，但我好有信心。」
提供租借服務
Rosemary的網上商店除了賣名牌服飾外，還有租借產品服務，她說：「我好了解女士們都鍾意新鮮而且希望日日一款式，但不是每個人都可承受到龐大嘅金額，就算買了不少名牌亦沒有地方可以存放，所以租係一個好好嘅方法，特別如果party或隆重嘅場合，更有不少心水之選，另外你亦可以成為潮流指標，日日不同款。」Rosemary的網店已有超過500多款配飾，當中有不少是精心搜羅，有些是古着，有些是獨一無二的產品，而網上亦有不少這類型的租售公司，Rosemary強調他們着重服務質素：「我哋有全套的接收及送貨服務，員工一定要有禮貌，而且會完全配合客人嘅需要。」
Rosemary每日花不少時間在公司上，她希望可以盡快上軌道：「其實結婚最主要原因係我想生小朋友，我希望將來有多啲時間照顧佢哋，所以呢一、兩年要好畀心機，將所有精力、時間放喺公司，博盡佢，等公司上軌道，到時可安心湊仔。」
跟母親關係
Rosemary初出道時，工作全由媽咪Julie安排，大小場合媽咪均陪伴左右，自從父母離婚，又因財產問題打官司，Julie情緒極度受困擾，與Rosemary關係也變得疏離，Rosemary表示一年也見不到媽咪幾次，她說：「佢依家成日唔喺香港，周圍去玩，我都唔知佢喺邊，有時都好想多啲關心佢，但佢有自己嘅諗法，唔想人擔心佢，好勝心強。（你結婚時父母會否同時出席？）我當然想，想佢哋可以分享我嘅喜悅，但要畀啲時間佢先。」
採訪：Jessica Lam
攝影：劉智源