BAR辣4女閨蜜互數

G：陳凱琳（Grace）、J：陳瀅（Jeannie）、M：劉佩玥（Moon）、S：何雁詩（Stephanie）

１：論夢想

小孩子充滿夢想，而四個女仔童年時不例外。就算現在四人漸露頭角，仍對未來抱有憧憬。然而，2013年港姐冠軍的Grace過去竟從未想過投身演藝事業，曾想疊埋心水學媽咪持家有道做師奶！

G：其實細個冇諗過做演員，選港姐都係志在參與，但我諗過做家庭主婦，我覺得最難做，睇見媽咪一腳踢兼任好多角色，我真心覺得佢好勁，好想學佢咁！之後讀書就讀傳理，嗰時就好想做記者做專訪，好細緻咁認識一個人。

S：我就想做港姐，睇電視覺得好型，又有得着靚衫，又有人Challenge你講嘢，好好玩。但唔夠高，得五呎二，冇計！選港男就有我份，哈哈！

劇中演出「公主病」的陳瀅反被指現實中最唔港女。	扮演律師的四位小花，於法庭上演舌劍唇槍。	陳凱琳笑言選港姐只是志在參與，未有想過會入行。

M：你選港姐實Sure Win囉！其實我細細個幻想過做律師、醫生或者警察，但係演員就要諗番起小六嗰時玩Drama，發現做演員咩都可以試，高考後諗過讀演藝定浸大，讀讀吓就諗做幕後定幕前。

一講起齊齊去旅行，四女便相當興奮。	放大圖片	陳凱琳與媽咪關係好，直言會與她呻公事。

J：我又係咩都想，想做護士嗰排就讀營養學，想做律師嗰期我真係有讀Commercial Lawo架，而我淨係知自己唱歌唔得！

S：但係你成日唱歌！其實我好想去紅館開個唱，呢個係我嘅長期目標！

M：反而我冇諗得太遠，做好每一個角色先，好似張繼聰教我「沒有小角色，只有小演員」。

２：談旅行

Grace將會為新劇《殭》到荷蘭拍外景，其餘三女仲話會跟隊去荷蘭，實行四個女仔去旅行！而Stephanie更表示想與她們去拉斯維加斯瘋狂一番，四女齊齊放低身份，懶理別人目光！

M：遲啲Grace拍劇會去荷蘭，我儲緊錢o架喇，諗住跟埋佢去！

S：我同Jeannie都Plan緊跟埋一齊去o架，你知我哋兩個都好鍾意去旅行，因為可以Care Free啲，唔使點理其他人嘅目光。其實一直都想四個女仔去旅行，我想同你哋去拉斯維加斯，雖然之前已經同Jeannie去過，但係四個會仲好玩！

J：係呀，我帶咗Stephanie落Club，咁啱萬聖節撞到好多兔女郎，影咗好多相，佢玩到返酒店先發現對鞋爛咗，但事後先發覺自己都冇着鞋！

G：好難得四個女仔一齊去玩，好期待！荷蘭隔籬就係德國，可以玩晒成個歐洲都得！我仲好想四個人一齊返加拿大添！但係落Club真係唔好搞我，我會好尷尬，我跳舞又唔叻，又唔識飲酒，我會喺屋企煲定糖水畀你哋返嚟飲！迫不得已嘅話就拎住雪碧扮係酒！

３：講媽咪

對於每一個女孩子來說，母親永遠都是自己的偶像，亦永遠是自己最強大的後盾。而阿Moon就自爆會主動向媽咪訴苦，面對凌厲回應，更會忍不住流熱淚！

M：我屋企好嚴，以前讀大學做功課夜返，媽咪都會坐喺梳化度等我返先瞓。但另外一面就好似朋友，入行後壓力多，會同佢講唔開心嘢，講完會鬆好多。有時佢又會回應得好凌厲，講到我喊，但喊完會鬆好多！

S：雖然我好少因為工作而喊，但我有一排都好谷底，好想做得完美，好彩我媽咪都好肯聽我講，無論咩時候肯畀個膊頭我。

J：我屋企人就比較分散，我自己就同婆婆最Close。

S：Jeannie個婆婆真係好得意，佢會攝利是畀隻狗，仲煲湯畀我飲！因為我冇公公、婆婆所以覺得好Sweet。

G：我媽咪同爹哋好彩都喺香港，不過我好多嘢都接住落，每日都有Goals要去完成，雖然會成日同媽咪呻，但係講完就算。

４：評港女

在劇集中演「公主病」角色的Jeannie，常被觀眾誤會現實都是嬌生慣養「港女格」。然而其餘三女均齊聲讚她零港女味，反而最「港女」就另有其人！

S：我覺得Jeannie係我哋四個裏面最唔港女，佢係最咩都唔計。

J：我真係崩咗指甲成個幾月都唔理，搞到畀人話懶！最「港女」就肯定係阿Moon！

M：咁梗係啦！得我一個人喺香港住咁耐土生土長！最唔港女就真係Jeannie，我覺得佢係好「不羈的風」，好率性，佢好多嘢就咁去，但係我就好多嘢都計劃咗，好介意人哋諗法，好多Burden，所以我要學吓佢。

G：其實個個都唔似港女嘅，不過阿Moon真係幾有好勝心、上進心，對自己要求真係好高！

後記

四女戲裏戲外異常合拍，攝影師未開口就自動埋位，又互相執好對方甫士。當Jeannie發號施令話做趣怪表情時，其餘三女就即刻轉Mode，令攝影師不期然會心微笑。

陳凱琳服裝：Bread & Butter

劉佩玥服裝：Varrie（Top）、Shutalk（Heels）

陳瀅服裝：b+ab

筆錄：若瑟

攝影：司徒國榮