阿倫笑Eason腳粗夠分量
譚詠麟（阿倫）前晚於頭場演唱會與谷胸性感舞蹈員跳舞。笑稱25歲有多的阿倫，感激歌迷40年的支持，並承諾唱到80歲。自稱「訕王」的阿倫，更請來「吹神」陳奕迅任嘉賓，兩人大唱大跳《重口味》之餘，更即場上演「吹水大會」。
譚詠麟（阿倫）一連13場的《譚詠麟銀河歲月40載》前晚於紅館開鑼，邀得歌神陳奕迅（Eason）任嘉賓。常忘記歌詞的阿倫全晚未甩過嘴，更唱到欲罷不能至晚上11時45分才完騷。阿倫與性感火辣女郎載歌載舞，期間又講到人生道理及抗壓方法：「遺傳自老竇，佢係天跌落嚟當被冚，船到橋頭自然直。佢教我男人膊頭要闊，孭起所有嘢。」
承諾唱到80歲
自稱年年25歲的阿倫透露當年做歌手時，其父叮囑他不要當唱歌是終身事業，他說：「一直諗唱到30歲啫，點知唱到『25對』都過咗龍。能夠喺娛圈咁耐除咗自己努力之餘，亦都有一班手足、幕後團隊，仲有班知音歌迷，多謝你哋，我會唱到80歲後。」
不見仔仔捧場
阿倫其後又生鬼地介紹Eason出場：「我認為佢同我一樣咁有分量，我分量係上半身，佢就下半身。」穿白恤衫、牛仔褲的Eason即現身舞台，兩人先合唱《朋友》，接住唱出串燒歌《愛情陷阱》及《重口味》。阿倫為搞氣氛，取笑Eason老及腳粗，並笑言：「Eason出名吹水，我就叫訕王，我哋唱歌喇，再講要加多場先得。」
騷後阿倫被問到為何不見仔仔譚曉風捧場？他說：「唔使返學？佢唔喺香港，學習為重，錄番畀佢睇。（佢冇要求嚟睇？）讀書喎，玩呀？」並透露會收看房祖名道歉記者會，記者大讚其仔仔曉風夠定性，阿倫即搵木掂說：「Touch Wood。」
文：音樂組