祖藍娶亞男 願做老婆奴

王祖藍與李亞男於昨日情人節，在九龍城一間教堂行禮及簽字，在逾半百傳媒及兩百親友見證下結為夫婦！現場更是星光熠熠，不少藝人都一雙一對到場，計有郭晉安與歐倩怡、抱着兒子的洪天明與腹大便便的周家蔚、陳國邦與羅敏莊及囡囡、張晉與蔡少芬，被稱為「四大處女」的鍾嘉欣、王君馨、岑麗香、苟芸慧及朱璇、王菀之、張繼聰、林盛斌、黎耀祥、宋熙年、薛家燕、無綫高層樂易玲等均到場致賀。新人將於今晚假迪士尼筵開五十多席婚宴，更定下參加者要打扮成卡通人物出席，未有準備者到場後可由大會借出服飾。

靚仔新郎好眼淺

身穿杏色西裝的祖藍甫踏入教堂已獲親友叫囂支持讚「好靚仔」，或許是過度緊張更一度行錯位，而新娘子李亞男穿上大露背婚紗小露事業線，翹着爸爸進場，一眾姊妹王君馨、朱璇及鍾嘉欣等已感動落淚！亞男上台時被婚紗的裙襬所纏寸步難行，祖藍即為她整理婚紗。其後張晉、蔡少芬、鄺文珣及老公、陳美詩及孫耀威為新人獻唱《全因為你》，祖藍感動得哭成淚人，不停以紙巾抹淚，又為老婆輕擦眼淚，之後杜麗莎、郭晉安及歐倩怡分別為一對新人獻唱及讀經。

新人徇眾要求咀嘴，來個法式濕吻，認真sweet！	祖藍拖着他心目中的「天使」亞男，高呼「哈利路亞」。	祖藍喜極而泣。

「天使圓滿生命」

雙方交換戒指前，祖藍對亞男發表愛的宣言：「李亞男，你係上帝派嚟嘅天使，感謝你嘅愛，圓滿咗我嘅生命，我愛你，但係我嘅愛並唔完美，我願意用我嘅餘生，同你一齊，從今以後我會專一服侍你，正如我專一服侍神一樣！」新人交換戒指後，在王菀之的歌聲下簽字成為正式夫婦，祖藍為亞男掀起頭紗後即咀足四秒！

長短腳咀嘴，祖藍企高兩級借位！	「藍男」婚禮莊嚴隆重，並由三pair好友獻唱，令祖藍爆喊。	「藍男」新婚夜撐枱腳歎香檳。

禮成後，祖藍再度喊住多謝亞男父母：「今日要改口叫爹哋、媽咪，多謝你哋教到個女近乎完美，佢身上所有嘢都係來自你哋，請你哋放心，點都好，你哋教到佢咁好，唔使擔心我會唔會傷害佢，我根本唔捨得傷害佢！」哭成淚人的祖藍繼續多謝家人，談起已去世的爸爸時三度爆喊說：「十三年前受洗，我哋仲可以一家人一齊，我知道天上有兩位爸爸睇住我，所以阿嫲多謝你，你生咗個好好嘅仔，佢又再生咗個好好嘅仔！」並感謝媽媽在他籌備婚禮時的忍讓。

亞男出嫁了，與伍允龍蜜運中的鍾嘉欣嫁期不遠吧？

伍允龍

咀得肉緊伸晒脷

亞男在發表宣言時就搞笑得多，情深感謝老公「揀咗我」及指祖藍是「無價寶」，祖藍反應甚大說：「嘩！咁客氣呀！應該係我講喎，大家咁話啦！」亞男還改不了口叫奶奶做「Aunite」。最後新人在親友要求下再次情深一吻，更肉緊得伸脷錫足五秒。二人在禮成後接受訪問，祖藍被指比新娘更感動而多次爆喊，他說：「平時佢就感性啲，我就嘻嘻哈哈咁，忍得耐一次過爆晒出嚟！」又笑指昨晨接新娘時要吃榴槤及納豆，因此老婆不太肯錫他。

至於他倆如何度過婚後的第一天及情人節？祖藍表示要過二人世界，到曾志偉經營的西餐廳吃晚飯，還搞笑說為了婚禮已冇晒錢準備情人節禮物，又揚言婚後不急於生BB。有網友指二人一直堅稱是虔誠的教徒，所以要待今晚擺酒後才洞房，難怪記者發現他倆昨晚飯後竟各自歸家！

文：影視組