Jeana轉軚撐露點壓力大
袁嘉敏接拍《鴨王》後是非多多，與一眾拍檔鬧不和的她近日索性玩失蹤，就連慶功宴也缺席，想不到「宿敵」何浩文及何佩瑜（Jeana）忽然轉軚幫袁嘉敏大講好話，後者更直言：「好明白女仔喺銀幕露兩點面對嘅壓力。」
Jeana、何浩文、唐紫睿、梁敏儀及導演區焯文，昨晚齊齊出席《鴨王》慶功宴，慶祝港澳票房達600萬港元，不過身為女主角的袁嘉敏缺席早前多場謝票及宣傳活動後繼續玩失蹤。席間區導談起袁嘉敏直認對方情緒波動：「最明顯係首映之後覺得佢唔開心，我約咗佢去飲咖啡開解，都花咗好多功夫氹佢開心。佢個人處理方面係有少少問題，對票房感到壓力，而且之前又有片段外洩呢。」他大讚袁嘉敏專業：「拍戲過程加戲減戲佢都即叫即做，之前佢做訪問，都係畀人斷章取義啫。」歐導表示之前有透過whatsapp通知對方昨晚慶功，惟袁嘉敏不在香港未能出席。
準備人體盛
而一向與袁嘉敏面左左的Jeana昨晚接受訪問「一反常態」謂：「雖然我同佢唔熟，不過作為女性，都好明白喺銀幕露兩點所面對嘅壓力。」在旁的何浩文插口表示：「佢唔嚟可能有工作啫，我幫手食埋佢嗰份。我有相熟嘅臨床心理學專家，有需要可以介紹畀佢，做演員成日都會有精神困擾。」至於早前他曾開口承諾票房過千萬，他會搞「人體盛」﹕「本來以為只會收3、4百萬，多謝觀眾對新人（我）嘅支持，票房去到800萬左右，我諗就要開始做定準備嘞。」Jeana聞言搭訕：「我唔會陪你，最多喺你身上夾壽司食囉。」
文﹕影視組