攝影喻人生 發哥世界不細小
【陳偉立、秦建輝北京直擊】有資格稱做攝影師的影帝周潤發花下大半生時間攝影，在鏡頭下看盡鏡花水月，將近六十歲的發哥，以攝影比喻人生分外有說服力。發哥認為取景不一定要壯麗山河，反而喜歡在小事物中發掘優點，追求完美的同時亦不會因偶爾失敗而氣餒，就如人生一樣，享受過程比實際成績重要。
神級影帝周潤發除演技精湛，亦是攝影狂熱分子，入行前曾售賣相機，被快門聲吸引而愛上攝影，不論菲林或數碼，黑白還是彩色相，發哥全都精通，曾舉行攝影展及贏得不少獎項，是圈中少有的攝影高手。日前發哥到北京宣傳新片《賭城風雲II》，順道與好友鄭振耀及師傅梁藝到六環區郊拍照，並帶同《東網》記者隨行，機會難得。
在人前談笑風生的發哥攝影時寡言認真，無視只得約零下五度的氣溫，輕盈地在崎嶇山路及濕滑冰面上來回搵景，每當發現有潛質的畫面，他都會仔細研究，甚至幾分鐘沉思，他拍下遼闊風景外，亦留意常被人忽視的小事物，此行就攝下躺在冰湖面上的一塊落葉，以及冰底下的殘荷，作品同樣具張力層次。
賦予殘荷生機
將近六十歲的發哥以深邃眼神看盡世情，訪問時以攝影比喻人生，問到是否喜歡在微細事物中發掘優點？發哥說：「睇吓你鍾唔鍾意嗰樣嘢囉！鍾意就睇到好多嘢，你唔鍾意嘅，你會話影嚟做乜吖塊爛葉，但其實你依家雖然見到嘅荷葉係殘晒，但喺黑房度二次創作，再賦予佢生命，靚到不得了！我多數影靜態物件，如果影到有種生氣，好玩o架！亦係種挑戰。」
際遇不可強求
攝影技術早獲認同的發哥，仍謙虛表示暫未有認為完美的作品：「永遠都唔會滿足，要不斷追求，同做戲有啲相似，會諗原來咁樣會好啲o架喎！」雖則如此，發哥亦深明凡事不可強求，抱隨遇而安的心態捕捉美景：「好似今日有光，但你第日嚟，冇光又影唔到，影相要天時地利人和配合。（影唔到理想作品會唔會失落？）點會失落呢？第一時間你對眼、你個身體已享受咗先啦！影唔影到都唔係咁緊要，影到咪當係Bonus囉！影唔到都已經享受咗好舒服嘅環境。（影到張靚相定係得影帝開心啲？）哈哈！兩樣都開心，影相比較自我，影帝係人哋嘅認同。」發哥又認為攝影與做導演拍戲的思考過程相似，但執導要兼顧的事情更多，故暫無意過導演癮。