趙式慶拯救消失的武林

趙式慶並非出身於武林世家，他是船王後人，華光航業集團董事長趙世光之子，已故船王趙從衍的孫，但自少與武術有緣，八歲開始習武至今，由空手道、南拳、自由搏擊、洪拳到通臂武學，身懷各家武技，由拳腳功夫到探研箇中的文化底蘊，以至投身武術保育行列，式慶把一切都歸結為緣分兩字：「我八歲開始跟師傅練空手道同其他武術，算係一種緣分。到06年我喺香港中文大學嘅人類學系修讀碩士，當時我嘅研究題目係中國南方拳術與周邊社會文化的關係，開始接觸好多唔同門派嘅師傅，其中一位就係洪拳宗師林鎮輝師傅。洪拳係南方武術嘅一個基礎，影響咗廣東省武術發展二、三百年，我覺得洪拳比想像中有更豐富嘅內容同文化，係好值得研究嘅領域，難得林鎮輝師傅不嫌棄收咗我做弟子，洪拳比較務實，好適合我嘅性格。而07年我又認識咗馬明達教授，跟隨佢工作，幫佢翻譯同武術相關嘅重要文件，好自然就開始去做同武術有關嘅保育工作同宣傳。」

趙式慶八歲開始習武，集各家武技於一身。

趙式慶在機緣下結識洪拳宗師林鎮輝，並拜師其門下。

嘆青黃不接

式慶慨嘆現今習武的人愈來愈少，由1949年至文革期間很多不同門派的武術傳人南下香港，但隨着香港的經濟急速發展，令傳統武術與社會產生脫節，以及出現青黃不接的傳承問題，他無奈地說：「武林消失嘅面積同量比大家想像中要大，近年受影視影響，係多咗人去學武術，但多咗人去學唔代表文化可以好健全咁保留，依家好多武術興趣班只係限於某類型，以太極、詠春為主，單講詠春喺五十年前有好多唔同詠春系列，廣州詠春、蛇鶴詠春等，但依家淨係講葉問詠春，變咗將其他嘢邊緣化，唔同武術代表咗唔同地域文化。」式慶表示很多權威的武術宗師年紀均在六十以上，每位宗師的身體狀況各有不同，紀錄的迫切性可想而知，近年式慶與城巿大學合作，通過全新數碼科技進行人體3D攝錄，功夫的每一個細微的關節動作都可以完整地記錄。

功夫與時裝

除紀錄工作外，式慶認為有必要重新包裝功夫的形象，故此大膽地涉足時裝界，推出名為「武道本」的時裝品牌，他解釋：「大家諗起功夫，係冇一個具體形象，一般都係着T恤短褲去練功，唔似泰拳會有成套儀式同比賽制服，我哋做文化保育，就係要傳承，要傳承就要年輕人對呢樣有興趣，我練過空手道，知道我着住套道袍時，成個人會進入一種狀態，呢個係着制服可以畀到你。」

式慶是船王後人趙世光與前影星何琍琍之子，但自小與武術有緣。

式慶與太太志趣相投，對方十分支持他從事文化保育的工作。

跟傳媒關係

式慶視武術為人生一部分，他形容自己性格固執、堅持，與學武不無關係。而宣揚武術，亦間接令式慶打破與傳媒接觸的心理關口，他直言：「我以前好抗拒同媒體打交道，但09年做功夫節要宣傳，當時嘅公關公司強迫我去同傳媒接觸，可以話係過咗一關，對我之後做嘢嘅態度，尤其同媒體方面接觸有徹底性改變，依家唔會用抗拒兩個字，而係有選擇性。」

式慶對文化保育一直義不容辭，人生在世，不知過去就沒有未來，他說：「少數民族文化又好，中國武術文化又好，都係祖輩結晶對大自然與人生嘅智慧，如果唔將佢傳畀下一代，我哋失去嘅唔單止係好重要嘅非物質文化遺產，而係失去咗一個認知如何以正確方式去生活。」已是一對子女之父的式慶稱傳承是談大方向，但也會鼓勵小朋友學習武術，薪火相傳。

遊子回歸

趙式慶心繫文化傳承，至於家業的傳承問題，身為家中唯一兒子的他從來不是野心勃勃，只是當年的閒雲野鶴式生活已不復再，昔日遊子已重新回歸公司業務，他風輕雲淡地說：「我睇好多嘢係緣分，好似我生長喺呢個家庭，由細到大，我爸爸、身邊朋友都話『係你o架喇』，由你出世嗰刻，已經決定咗你要做呢樣嘢，但係近呢十幾年嘅工作經驗令我覺得，人生好多嘢唔係必然，你嘅快樂同擁有嘅都唔係必然，我會隨緣去處理呢啲問題，暫時我嘅家業好穩定，有好好嘅團隊去參與，我嘅參與度愈嚟愈明朗化，喺我唔放棄現有嘅工作情況下去參與，我可以做幾多，係需要時間慢慢去考驗，我冇答案。」