徐頴堃運動排毒懶做facial
徐頴堃（Erica）唔單止係影星徐少強及雪梨愛女，仲係米雪姨甥女，由細到大都萬千寵愛在一身，亦生得標致可人。真正嘅幸福係有樣睇，因為皮膚係反映一個人嘅身體同情緒狀況，你睇吓Erica！皮膚靚到滑不留手，零毛孔到好似BB肌膚，唔好以為佢做咗打底工夫，實際係零化妝，佢仲話自己好懶，唔多做facial，認真令人妒忌。
問到Erica的保養秘訣，佢就話自己食得健康、瞓得充足，得閒仲要做運動出汗排毒，最重要係保持心境開朗，咁就由內靚到外。睇真啲，唔化妝嘅佢更清純之餘，更加激似鍾嘉欣，若然唔識佢哋兩個，仲以為佢哋係雙生兒添！
