陳細潔法國滑雪偷雞嗒番杯
眾所周知「鯊魚女」陳細潔熱愛紅酒及滑雪，早前她到法國滑雪，膽粗粗「偷雞」在滑雪場飲酒，指是她的夢想之一，並揚言有自制能力，決不會飲醉滑雪；而另一個心願則是跳降傘時在空中歎酒，可惜危險性極高，沒可能成事。
陳細潔（Abbie）每年均會與好友滑雪，今年於一月尾選擇到法國滑雪勝地Courchevel滑雪，她說：「呢度我去咗5、6次，係我最鍾意嘅地方，因為好大，又有三個山頭，風景好靚，就算人多都唔會逼，今年滑得好夠喉，搞到心郁郁，所以三月會去北海道滑多次。」Abbie又大讚Courchevel另一個吸引之處是山上有不少美味餐廳，她說：「我哋滑咗七日雪，由早上9點滑到下午2點，之後喺餐廳飲飲食食，然後再滑落山。」
跳傘歎酒夢碎
談到今次的難忘事，Abbie笑言：「今次就帶咗兩支酒一邊滑，中途休息飲。（可以畀飲酒？）唔得o架，所以偷偷哋飲得好快，唔好畀人發現。（有冇醉意？）咁又冇，唔係飲好多，如果醉咗就唔會滑落去，會坐車落山，但一邊飲酒一邊滑雪係我心願。」她又稱另一個心願是想在跳降傘時拿住杯酒：「以前玩過跳降傘，當開咗傘喺空中時，望住下面嘅風景，心情極好，可惜就係少咗杯酒，不過跳傘時衝力好大，啲玻璃一定會爆，太危險，唔會畀你咁做。」
Abbie早前被家姐陳小寶踢爆有男友，還求了婚，問到此行男友有否陪同？她說：「冇，佢係書呆子，唔識滑雪，我咁鍾意運動又鍾意飲飲食食，要搵到個啱邊會咁容易。（有冇計劃結婚？）係家姐見到有好啲嘅朋友就不停催，我唔理佢，感情隨緣。」
文：名人組