G.E.M.拖新歡示威 馮允謙：夾就嚟啦
「太空天后」鄧紫棋（G.E.M.）近日與舊愛林宥嘉隔空「互片」，被男方暗寸惡毒的G.E.M.前晚急拖「巨聲」新歡馮允謙示威，並火速將兩人合照放上網，對於有否機會發展？馮允謙露口風說：「如果好夾就嚟啦！」
鄧紫棋（G.E.M.）日前為宣傳3月於台北舉行巡迴演唱會，暗寸舊愛林宥嘉冇承擔，他即時在社交網站寸爆G.E.M.及大讚現任台灣女友丁文琪，丁文琪亦加把嘴在網站留下「冷飯論」：「原來是因為冷飯比較瘦的關係啊。」有網民即寸爆G.E.M.說：「難怪有人愛炒冷飯！」抵死的丁文琪亦和應說：「冷飯放了快一年，吃了會生病啦。」
此言論激得G.E.M.即時搬出「巨聲」新歡馮允謙（Jay）還拖，還將兩人在嘉年華喪玩機動遊戲、擲公仔等短片及合照放上網，照片中兩人齊齊戴上口罩並單獨玩機動遊戲。
大讚人好又有才華
Jay昨晚以嘉賓身份出席林志美音樂會，他被追問與G.E.M.是否爆出戀情？他說：「我哋喺教會識，我參加《超級巨聲3》時佢有留意我，之後大家有保持聯絡。（搵你嚟激佢嘅舊愛？）唔知咩事，大家一班人去玩。」Jay隨即大讚G.E.M.有才華、唱得、跳得、人又好，問到會否有發展機會？Jay洩露心聲說：「我專心做音樂，唔諗拍拖住，如果好夾就嚟啦。（日後會避忌？）唔會，藝人同藝人之間可以做朋友。（BBQ唔去去陪G.E.M.？）本身話去嘉年華玩，係同班教會朋友去。」不過，G.E.M.至截稿前未有回覆。
另外，G.E.M.好姊妹李蘊坦言嬲對方：「嬲佢難得喺香港都唔約我去玩。（重色輕友？）唔係，佢好多男仔朋友，不過有少少呷醋。（覺唔覺得佢兩個合襯？）外形OK。」李蘊還自爆曾在G.E.M.去年生日會見過Jay。
文：音樂組