成龍嘆難陪祖名過年
因容留他人吸毒罪成被判囚的房祖名，將於下周獲釋，其父親成龍昨日現身活動時預告，因忙於為新片走埠宣傳，屆時不會到北京接仔，亦未能一家共度春節，不過就對祖名於看守所幾個月很放心，不諱言會讓兒子自主日後的路，不希望他活在其陰影下，但與太太林鳳嬌永遠是祖名後盾。
成龍正埋首賀歲片《天將雄師》宣傳，近日他喜事連連，先獲馬來西亞受勳拿督，又成為全球最欣賞男士第四名，他昨出席「第20屆羽絨城送暖行動」時也表示：「可能2014年唔好，補償番畀我，2015年有個好開始。」
對於祖名即將獲釋，成龍坦言不會到北京接他：「唔知佢幾時放，你哋仲知得多過我，探佢都冇，咁大個仔等佢自己打理，唔好活喺我陰影下。（好耐冇見個仔？）以前兩年都唔見一次，不過呢次好放心，佢好似入去讀咗個大學咁，希望佢出嚟好好面對自己未來。我唔會為佢講任何嘢，但我同阿嬌（林鳳嬌）係佢後盾，都係壞事變好事。（開記招？）等佢決定，同公司安排，我身份係佢老竇，畀佢自己揸主意。」
阿嬌要齊受罰
談到祖名早前於庭上的表現，成龍表示看過片段，認為兒子表現不錯，有記者讚祖名比之前靚仔，成龍打趣謂：「咁要坐耐少少，罰佢多啲。（阿嬌仲係唔出街？）唔見人、唔接電話，話同個仔一齊受罰。（覺得自己教得唔好？）唔敢問，我哋都未探過個仔，媽咪寄過封信畀佢，但唔知寫乜，不過過年我都唔可以一齊，等佢同媽咪過啦。」
新年要在內地工作的成龍續說，情人節不會買花給阿嬌，他笑說：「佢生日都係過咗先知，送得一年就年年都要送，好日嘅就日日都係生日同情人節。」
文：影視組