發哥感動邀the pancakes首映自拍

網上最近吹起一股「發哥熱」，網友鬥晒與影帝周潤發的合照，未有成功集郵的唱作歌手the pancakes自創新歌《給發哥的歌》，表明想親見偶像發哥及合照，旋即被網民瘋傳！皇天不負有心人，歌曲終傳入發哥耳中，他被深深感動，打算邀請the pancakes出席《賭城風雲II》香港首映，讓她與自己合照圓夢！

發哥、發嫂孖住捧劉嘉玲場，發哥得悉the pancakes寫歌給他十分感動，邀她睇賀歲片。

神級影帝周潤發向來生活儉樸，身嬌肉貴仍不介意逼港鐵、逛街市、行山，市民隨時可「捕獲」這位親民影帝，發哥總是來者不拒，更會出動其「自拍神手」與fans貼頭自拍，成功集郵的fans都在網上炫耀一番，引來其他網友妒忌！

癡心自白齊齊自拍

發哥、張家輝及劉嘉玲主演的賀歲片《賭城風雲II》快將上映，新一輪發哥熱再度hit爆，再有大批網友重post與發哥的合照，自認是「發粉」的唱作女歌手the pancakes（蔡明麗）遺憾從未與發哥合照，最近創作新歌《給發哥的歌》抒發感受，想不到回響甚大。她曾留言說：「我真係受夠喇！個個都撞到周潤發哥，係我撞唔到！我決定化悲憤為寫歌！……作為一個阿嬋（連中女都唔再係），今次我真係豁，豁咗出去，希望我會在不久的將來，能夠和你偶遇，並且畀你聽呢首歌……然後一齊在街上自拍，再一齊跳起Yeah！」

歌詞大概是一名癡心fans恨見偶像的自白：「發哥你啲fan屎有很多，我是其中一個……好想跟你自拍囉！係瘋狂咁影喎……每一天都有人將你捕捉到，我好羨慕但係唔葡萄，你份人咁好，你個人咁高，全香港都將你當係寶！」歌詞既直接又得意，加上the pancakes用其招牌「唔啱音」唱腔演繹，深得網友喜愛，不夠十日其facebook專頁已有逾32萬人次瀏覽，YouTube則有近7萬個點擊，就連影星杜汶澤都有轉發及留言支持！

the pancakes作歌給發哥，可謂「一曲成名」！

the pancakes為發哥寫歌，在facebook的瀏覽人次高達卅幾萬。

《賭城風雲II》
劉嘉玲、周潤發

真誠打動圓合照願

事件在大批網友狂推下，終傳入發哥耳中，發哥聽到歌曲後大讚the pancakes唱法可愛、歌詞真誠，親民的他更提議電影公司邀請the pancakes蒞臨下周五（13日）的香港首映，屆時會跟她合照，一圓這位超級fans的夢想！發哥說：「好感動呀！有人作首歌畀自己搵自己，同埋佢唱得好得意好cute囉！如果安排到見我一定要見啦，咁真誠！我都安排咗叫佢嚟睇首映，到其時咪同佢影番張相多謝吓佢囉！謝謝！」發哥又表示歌詞中有提及發嫂，屆時會兩夫婦孖實the pancakes合照，認真恨死隔籬。