何倍倩沉迷花藝 囝囝唔Like
藝術能陶冶性情，恒生新抱兼Zensation老闆娘何倍倩深明這個道理，因為她視插花藝術為最大的興趣，可以關掉電話花半天在家插花，惟兒子卻並不欣賞，每逢行街經過花店，他便拉着媽咪離開，令何倍倩啼笑皆非。
何倍倩（Anina）喜歡花藝，初學時由基本知識開始，學習各樣花種的特性及花泥設計，曾請花藝師私人教授，又試過報讀證書課程，學習年半，愈學愈感興趣，並從插花學懂生活平衡的重要，她說：「插花要好專注，個人會好平靜，平時工作好忙，喺插花嗰段時間完全唔理其他嘢，我會熄晒電話和電視，全心全意去完成一盆花，感覺好舒服。」她續說：「有時你送花畀人，人哋又會煩點插盆花，我依家會插好晒，成盆花送畀朋友，收花就唔使煩點處置。」
示範熊仔花
Anina經多番鑽研下，掌握花泥的技巧已非常純熟，能夠插出不同的公仔形狀的花藝來，設計過狗仔花、兔仔花和手袋花藝，早前她便親自示範製作熊仔花藝，不消一個小時便完成，認真熟能生巧，她說：「做熊仔花時，首要決定花泥大小，好似呢個（約12吋高）就無需要用鐵線鞏固，如果想做大啲，花泥裏面就要加鐵線，將花泥慢慢修輯熊仔頭形和身形，其實唔太難，市面都有得熊仔形嘅花泥賣；而花方面，可選用小玫瑰花或小菊花，玫瑰花做出來嘅效果「毛髮」鬆啲，但缺點係花唔擺得耐，如果用小菊花，起碼可以擺到兩個星期以上，我會揀綠色小菊花，小菊花慢慢凋謝會由綠色變成黃黃哋色，熊仔好似一瞬間變身，凋謝時都一樣靚。」
望女兒接棒
插花時需要準備較剪和膠紙，她將小菊花腳斜剪斷，輕輕手插入花泥中，建議插花時，不要太用力，要用陰力，耐心加細心下，她說人人都能夠做到。不過，她說長子最不喜歡她插花：「佢唔鍾意我插花，因為一插就半日，寧願我同佢玩，所以見到我行花店就會好嬲，話no no no就拉我走，佢始終係男仔，惟有希望細女可以接棒，第時一齊插花。」而向來有生意頭腦的她，見熊仔花如此受友儕歡迎，決定融入生意中，請來花藝師合作推出花藝禮品包，讓收禮變得更錦上添花。
注意眼鼻嘴配搭
Anina說插熊仔花揀配件好重要，特別是眼、鼻和嘴，她試過好多個不同形狀的眼、鼻和嘴，做出來的熊仔好大分別，她說：「試過用大鼻膠珠，點知做出嚟似狗仔多過熊仔，太細又好似有啲惡，試過好多款，呢款就最馴，係馴馴熊。」
文：Tracy Leung
攝影：劉智源
場地：Cocktail Jojo