JC桃花催運 等收驚喜
農曆新年將至，混血模特兒Jessica C.昨日在活動中入鄉隨俗，穿上貼身旗袍示人，展現美好身段及東方美，她還跟大會安排的一名型男在桃花樹下行大運，寄望來年愛情繼續甜蜜得意，更在圈中廣結人緣！
模特兒Jessica C.（JC）和藝人呂慧儀昨日身穿旗袍出席迎新春開幕禮活動，二人還走貓步出場，拿着賀年揮春應節，洋化的JC還跟大會安排的型男在桃花樹下翹手繞三個圈，取其好意頭，除繼續與男友安志杰（Andy）甜甜蜜蜜外，還望貴人相助，事業發展更順利！JC還說知道紅封包的意思：「我知做嘢嘅人同埋結咗婚嘅人會派，寓意將好運帶畀人。（你準備咗未？）未啊，唔係今年，我都係等收利是。（好快同Andy結婚？）我好享受同佢一齊呢個時刻，大家好開心。」
讚男友為人浪漫
情人節將至，JC未知如何慶祝，希望收到驚喜，問她可有準備禮物送給Andy？她說：「準備緊，佢係個好男人同好浪漫嘅人，一定要花啲心思。（親手整？）未知住。」她又說很羨慕及驚嘆呂慧儀生BB後，身材仍fit到漏，問她是否喜歡BB？JC說：「我鍾意啊，我妹妹都生咗BB，所以我有好多姨甥。」
呂慧儀有兩情人
明顯修身的呂慧儀正忙於為將近半歲的BB「蟹籽」準備新年裝束：「我希望同『小情人』一齊去買新年衫，同埋開始教定BB一啲新年習俗，例如同佢一齊用碌柚葉沖涼。（咁『大情人』老公黃文迪有冇呷醋被冷待？）佢長期被冷待o架啦，好彩老公好包容我，嚟緊情人節同BB諗嘢氹吓佢。」未來呂慧儀想追個女，湊成「好」字，不過一切順其自然。
文：名人組