發哥肉搏盧惠光「點」數贏晒
今年賀歲檔電影爭崩頭，單是港產片已掀起一場激戰，隨着上映日子逼近，電影公司各出奇謀，由周潤發、張家輝孭飛的電影《賭城風雲II》，近日於網上流傳片長一分鐘多的終極預告片，片段玩盡海陸空大爆炸、發哥經典揸雙槍戲份等，亦有化身鐵金剛，徒手捉實已炸到穿窿的飛機，視覺效果十足。
距離農曆新年尚有兩個星期，但賀歲片已一觸即發，繼吳君如帶頭的電影《12金鴨》預告豪擲30萬擺年宵攤位後，由周潤發、張家輝及劉嘉玲主演的《賭城風雲II》亦加入戰團，近日網上就流傳一條終極預告片，片段中揭露該片將玩盡海陸空大爆炸，吸睛度非常。
該片段約長一分鐘多，除了有發哥露點與盧惠光一較高下外，亦有重現他於《英雄本色》的雙槍雄姿，更有一場講述發哥於飛機上發生大爆炸，但他就如鐵金剛般，徒手捉實炸至穿晒窿的機身，認真身手非凡，而電影公司為凸顯發哥戲中形象，特別找來一隻機械人作為發哥的管家，為求逼真，片方仍於特效方面作出最後努力。
4個月減30磅
至於一場發哥於嘉玲面前與盧惠光對打泰拳戲份，由於要赤裸上身露兩點，發哥亦有為此事前keep fit，拍攝時亦有跟盧惠光學習及討論，不過發哥仍感壓力，他謂：「都好耐冇喺鏡頭前露上半身，所以辛苦啲，搵咗個教練幫我練大隻啲，練咗4個月減咗30磅，但都練唔到一身肌肉。」雖然發哥未對其身形感滿意，但對手嘉玲卻大讚他精神奕奕兼有「瞄頭」。
對於發哥的表現，盧惠光謂：「畀發哥打好開心，仲要係佢同導演講指定要同我打先打，作為粉絲嘅我當然高興，發哥係前輩級身手好好，拍呢場戲拍咗三日，佢好專業，修身修得好好，成個人firm晒！」
文：影視組