何家駒搵得使得 存摺剩百元

憑電影《監獄風雲》中飾演「大咪」奸角而闖出名堂的資深藝人何家駒，前日凌晨因病離世，終年66歲，昔日老拍檔如周潤發、黃光亮等大表惋惜。而何家駒生前好友曹查理則在何家駒入院後，一直都有照顧對方，每天透過由他介紹給何家駒的人壽保險經紀了解何家駒情況，曹查理說：「我同佢識咗十幾年，係好好既朋友，佢一直有糖尿病，入院嘅時候，情況已經好壞，原本要截肢，之後因為醫生幫佢放咗啲血，就慢慢好轉。26日下午，我接到經紀嘅電話，話佢好咗好多，應該兩至三個星期可以出院，點知27日凌晨三點幾，醫生發現佢呼吸困難，跟住好快就走咗，暫時未知死因。」

三日輸二千萬

曹查理昨到東莞常平何家駒寓所執拾遺物，看到何家駒屋企凌亂不堪，有些感慨，他謂：「佢屋企好多垃圾，睇到嘅時候都幾慨嘆！其實佢呢十幾年靠登台都搵到錢，應賺到五、六百萬，但依家有啲銀行嘅存款得番百零蚊，都唔知啲錢去咗邊，我都有成日勸佢儲錢。」有指當年何家駒曾搞過傳媒事業，亦曾試過因賭錢三天輸掉二千萬身家，對此，曹查理則表示未有聽聞過。

由於曹查理不是何家駒直系親人，故為亡友搞後事頗有不便，他希望找到何家駒妹妹幫手：「可惜佢妹妹一直都冇覆我。我都聽過何家駒講過，佢同妹妹好似因為佢哋媽咪層樓搞到唔開心，之後好少聯絡。」他表示若聯絡不上何妹，仍會為亡友打點，或會將其骨灰撒公園。

何家駒昔日好友資深製片人張國忠亦對其離世深表惋惜，並直言對方是自己的「師兄」，張國忠表示：「佢（何家駒）當年教我點做製片，我啱啱落機聽到呢個消息，都希望聯絡到佢嘅屋企人。」

文：影視組