祖兒要歸宿 千嬅爆料：你都近啦！

楊千嬅前晚舉行「楊千嬅Let's Begin世界巡迴演唱會2015」第二場，老公丁子高、好友劉浩龍、蔡一傑、郭偉亮（Eric Kwok）及葉佩雯均是座上客。今場請來的嘉賓更是千嬅在頒獎台上的長期勁敵容祖兒，兩大天后實行在紅館舞台上以行動「破冰」！

失戀情歌唔療傷

在Encore環節，兩位天后世紀合唱祖兒金曲《習慣失戀》。千嬅自爆當年經歷失戀低潮時，在K房大唱祖兒的情歌療傷：「但愈唱愈Lonely，唔係好療到！」祖兒即乘機玩食字說：「唔療到？咁咪好潦倒！」

雖然多年來二人在頒獎禮上鬥到你死我活，但原來互相欣賞，千嬅說：「唱片公司之間就好鬼麻煩，有啲敵對心態令個市場熱鬧啲，呢種Marketing嘅嘢我就唔識計。當然喺頒獎禮上，大家都係競爭對手，喺嗰一份鐘好緊張，唔係你贏就我輸，當然嗰刻好唔『鋸』，係咪先？」祖兒亦深表認同說：「任何一個市場都唔可能只有一個產品，例如唔能夠只有iPhone，亦要有Samsung，最重要係大家都係咁受歡迎！」

丁子高（左起）、蔡一傑及劉浩龍排排坐睇騷。	被視為勁敵的千嬅與祖兒攬攬泯恩仇。	千嬅前日再換上三套新裝見歌迷。

天后男人總是「獅」

接近尾聲時，祖兒對住已為人母的千嬅送上祝福：「我好羨慕你已經踏入人生另一個階段！」千嬅即爆料暗示祖兒將嫁人：「你都近啦，好快o架啦！」祖兒亦大方表示女人最需要一個好歸宿。二人隨即指向台下的兩位天后的男人－丁子高及劉浩龍：「嚟咗咩？係喎，兩隻獅子（同屬獅子座）。」

千嬅趁機繼續牽紅線說：「我呢個場好旺，我助手當年喺我演唱會識咗佢依家個老公。當年個演唱會叫『開大』，結果佢哋真係開大，啱啱生埋BB！」祖兒聞言露出甜笑，再向千嬅送上擁抱。

文：音樂組