簡淑兒主播學戲挑戰難度
落選港姐簡淑兒（Jessica），原來當初參選港姐只是想一圓母親願望，於是趁在美國畢業後，便膽粗粗返港陪家姐面試，她說：「其實都係練膽量咋，競選嗰時一舊雲咁，都唔係做番自己，只係想去模仿香港小姐啫。因為好驚，所以成晚比賽都表現唔好，之後就參加節目《一切從落選開始》被選中，慢慢就做主播。」
擁有甜美笑容的Jessica，透露以往曾在辦公室工作，但好動的她卻不習慣：「坐定定真係好辛苦，好想有份工係可以同多啲人交流，好似依家做主播就好充實同滿足。」為打好底子，將來有機會在戲劇方面發展，Jessica開始跟資深舞台劇演員彭秀慧學戲，談到外形似足鄰家女孩，感覺需要人保護，伊人卻耍手兼擰頭謂：「咪睇我好似好斯文，其實有時都幾大癲大肺，又鍾意玩war game、騎馬、賽車咁，呢排仲學緊電單車添，哈哈！」
Profile
姓名：簡淑兒（Jessica）
年齡：24歲
身高：1米67
體重：47kg
簡介： 於美國完成大學課程後，返港參加2012年香港小姐競選打入29強，現時擔任無綫娛樂新聞台主播。