黃翠如 蕭正楠 合體吸金多人吼
蕭正楠與黃翠如於無綫劇集《師奶Madam》演出搞笑，大受歡迎令二人狂接job，翠如主力香港商演，蕭正楠則在大陸密密登台。據知，蕭正楠一場騷最少有十萬元酬勞，高峰期一個月更接八個show，袋袋平安。最近，不少廣告商更向這對小情人「問價」拍廣告，蕭正楠接受電話訪問：「好奇怪，我哋未試過一齊去外邊登台，不過之前因為拍劇，都推咗好多job，依家趁有時間，搵得幾多得幾多，廣告就梗係想齊齊拍，最多畀個開心情侶價。」
高Ling恨拍拖
另外，蕭正楠、黃翠如昨日出席《師》劇宣傳活動，翠如化了一個鬚根look妝與蕭正楠情侶look。大會為張景淳慶祝生日，蕭正楠竟叫翠如獻吻，他受訪時說：「佢好有分寸嘅，都冇錫呀。」
此外，翠如與高海寧為《好報》B冊擔任封面女郎，二人相約食賀年菜攞意頭。翠如指新年「習俗」要由內到外也換上新衣，而高Ling笑言新年掃地要視乎方向，去年順境要向內打掃，不順則要將衰氣掃走屋外。情場得意的翠如說：「上年雖然有啲波折，但就好快過關，希望簡單、平安笑住度過。」Dry爆的高Ling則希望打破Dry缽，立志先要「愛離家」脫宅。
文：影視組