祖藍王宮超支7成 拗數報警

藝人王祖藍即將在下月14日情人節與女友李亞男拉埋天窗，而早於2013年7月豪擲1,340萬元購入大埔雅景花園的過千呎海景獨立洋房的祖藍，更斥巨資裝修「王宮」！不過「王宮」裝修卻搞到一鑊泡，發生錢銀糾紛兼鬧上警署！

已畀9成訂

昨日王祖藍與未婚妻李亞男出席奇華嫁喜餅活動，在活動上分享二人的拍拖點滴，不過祖藍在接受訪問時則大爆裝修愛巢發生「小插曲」，埋單多出一截兼被對方威脅：「我最初畀咗9成訂，最後個尾數比最初多咗7成！但裝修公司指我唔畀錢，就唔畀番車房鎖匙，之後裝修公司報咗警。」祖藍更表示當時事件未公開，已有傳媒致電他，指他沒有出糧給裝修工人，並笑說：「警察幫我備咗案，不過警察冇幫佢。」

李亞男	「合巹交餅」	祖藍的新居裝修了15個月。（資料圖片）

裝修15個月

祖藍接受電話訪問時表示裝修師傅出爾反爾：「本來係舊年8月收屋，去到11月先有，不過一定要收到屋，因為我搬出去住嘅臨時屋都租約期滿。其實我好準時畀錢，不過裝修費多咗，都係想睇單了解吓，本來裝修師傅話畀我睇，最後又唔畀我睇。」雖然祖藍又呻新屋裝修15個月依然漏水，不過他就安慰自己：「早排冬天都冇咩落雨，都有漏水，可能係呢個愛巢引狼入室，不過小插曲嚟啫，最緊要快啲搞掂！」

另外，準新娘李亞男昨日在活動上坦言上海親戚多，農曆新年前會同祖藍返上海，與鄉親父老食餐飯兼拜早年。問到李亞男的心情，她說：「好想快啲到結婚當日。」

採訪：影視組　

文：專案組