朱慧敏撐Eddie 鱷魚頭老襯底
早前被拍得在夜店「攬女」的藝人彭懷安（Eddie），昨日連同梁漢文、蘇永康及唱片公司老闆簡文滌等眾投資者現身西環，為旗下的「華星客棧」餐廳舉行開張儀式，獲鄺美雲（Cally）、莊思敏等圈中人到場支持，現場更有舞獅助興，場面熱鬧。Eddie女友朱慧敏（Queenie）亦在場打點，Queenie稱新店亦有份投資，而近月不用拍劇，每日都有到餐廳幫手，更直言是因為信任Eddie才加入。
梁漢文老婆管錢
而Eddie則坦言今次是他首度與女友一同接受訪問，因而心情緊張。問到上次夜店事件，Eddie稱事前已告知女友當日會到夜店，他說：「我冇攬女坐大髀，淨係企埋少少講嘢，事後好多朋友問候我，都擔心我『瀨嘢』，經解釋過後都無事啦！最緊要隔籬嗰個知道咩事。」在旁的Queenie亦立即幫口：「我對佢百分百信任，啲相都係傾偈啫，佢平時Record好好，我都好信任佢，有時好肉赤佢，雖然個樣好惡成個社團人士咁，但其實個人好好，個樣好卡通。」
至於老闆之一的梁漢文就表示﹕「我同康仔，仲有好多人都有份夾吓，大家都好支持文滌。」自言看到「華星」分店一間接一間地擴充，是否賺得盤滿缽滿？他說：「唔知呀，呢啲要問我老婆！」而Cally則表示自己從未投資飲食業，但身邊很多朋友都有開餐廳，故還是安心打理珠寶生意。又稱月底要忙一連串的慈善活動，為佛堂派粥給慈善團體。
文：音樂組