吳若希唱出香港 越南越愛

「無懼世事變改，還是越難越愛」，這首無綫劇集《使徒行者》片尾曲去年風靡電視界及樂壇，成績驕人。吳若希昨日出席「越難越愛祝捷活動」，為慶祝唱片《越難越愛》大賣一萬張，及歌曲《越》在網上音樂平台長據超過100日榜首位置，老闆何哲圖即場送上金唱片等兩大獎座給Jinny，相當威水。

拒絕沉溺喜悅中

穿上背心連身裙的Jinny大晒玉背，她在台上表示正苦練越南版的《越》，大呻是最難學的語言，但揚言學有所成便會上載歌曲到社交網站。對於樂壇成績理想，她表示連菲傭界也有捧場客：「呢首歌咁多人識，劇集都幫我好多，我知道台灣粉絲有追睇，我工人姐姐，即係佢家鄉菲律賓嘅朋友都有聽。呢個係一個肯定，但完晒全年成績表後，我會將呢啲獎勵放番低，唔好沉溺喺喜悅之中。」

吳若希獲老闆何哲圖即場送上金唱片等兩大獎座。

林奕匡亦是唱得之人，吳若希坦言想與他一齊捧獎。

想與林奕匡攞獎

對於周日舉行的「勁歌金曲頒獎典禮」，Jinny直言有信心奪獎，亦睇好同年出道的林奕匡，寄望屆時能夠齊齊捧獎而歸。提到她在上個頒獎禮性感示人，Jinny笑言「只此一次」：「上次已經係極限，今次會保守少少，我驚凍，入冬以嚟個病都未好過，想保暖啲。」

文：音樂組