雨僑搵猛男開波

雨僑將於周六參與「傷健群鷹慈善籃球嘉年華」，為香港傷殘青年協會籌款，為了當日有好表現，雨僑昨日接受本地甲一籃球隊飛鷹兩位球星蘇伊俊及陳家進特訓，練傳波、運球及射波等基本功，雨僑很快便上手，見她跳投準繩，只是未能做到插花運球等較高難度動作。

練習期間，雨僑向身材高大的蘇伊俊挑戰，玩「1 on 1比賽」，蘇伊俊讓賽下，雨僑兩度跳投得手，打至2比2時，求勝心切的雨僑竟出茅招，將控球在手的蘇伊俊推跌。之後蘇伊俊扮報復，射球時以手按住雨僑的頭，令雨僑動彈不得。

陳家進（右）率雨僑練習傳球。	雨僑打茅波推跌蘇伊俊。	高大的蘇伊俊射球時以手按住雨僑的頭，場面搞笑。

射錯籃被笑15年

賽後兩位球星讚雨僑球技不俗，陳家進讚她有姿勢有實際，蘇伊俊更說：「我畀佢99分，明顯有學過！」原來雨僑中學時曾參加籃球隊，但多數任後備，並自揭有陰影：「試過比賽時射錯咗自己隊個籃，之後就冇得再出場！畀人笑足15年，希望今次一雪前恥。」

雨僑直言欣賞運動型男生，但提到緋聞男友羅力威屬音樂男，問如何比較？她即補飛說：「總之男仔有一技之長都吸引，無論係音樂定運動。（約羅力威打波？）我同佢個樣邊個似識打籃球？（約埋做咩運動多？）都係文靜嘢，如果做運動，我多數一個人跑步，同人一齊跑，會發現我特別慢。」

文：影視組

攝：李柏儒