黎美言人生過山車
入行七年的黎美言（Winkie），一直以組合HotCha成員的姿態示人，經歷隊員分開發展及飽受情緒病困擾的低潮期，終於在家人和朋友的鼓勵下重新振作，經歷人生起跌的Winkie更將自己的心路歷程寫成新歌《我不完美》，向樂迷分享她這幾年的苦與樂。
焦慮爆喊
由大學跳舞比賽獲唱片公司賞識開始，Winkie就連同兩位隊友Regen和Crystal，合組成三人女子組合HotCha闖樂壇。回望入行七年，Winkie經歷隊員離開被迫作個人發展，同時亦令她陷入迷失自己的位置，她憶述當時陷入人生樽頸位：「我個人本來就好情緒化，加上當時組合有變化，隊友要去讀書，成日會諗自己跟住會點，一連串煩惱導致去到一個位好似唔知自己做緊咩，每日都好焦慮，遇到咩事都好擔心，嚴重到試過做嘢時情緒突然好低落，然後就衝入廁所爆喊，嚇親身邊同事。」
母勸退出
雖然飽受情緒病困擾，但Winkie一直故作堅強死撐，她說：「平日出嚟大家唔會知，但其實成日都瞓唔到，嗰排生到成面瘡，喉嚨又生息肉，影響住我唱歌，一直要睇醫生。當時情緒好唔穩定，經常暴飲暴食，而且完全唔想見人，索性剪短把頭髮，有一段時間好肥、好短頭髮就係嗰段時間，呢個陰暗期維持咗兩、三年，大家唔知，包括我隊友同歌迷，因為我一路冇講。」
終於連黎媽媽都不忍女兒情緒受困，Winkie坦言：「當時媽咪好擔心，見到我日日咁喊，直頭同我講叫我唔好做，屋企又唔係等你開飯，不如唔好咁辛苦，嗰刻聽完好感動，跟住就覺得自己入行其中一個原因係想屋企生活好啲，所以媽咪咁講我就更加要爭氣。」能夠走出陰影除了家人支持外，亦要靠身邊朋友：「佢哋知我情緒唔好，成日喊都睇唔過眼，於是每日打嚟同我傾偈，我唔想見人時都會搵我出去食飯飲嘢。」
睇書自救
自此Winkie開始一連串的自救行動，她說：「我係靠睇書開始，睇好多心靈勵志書，然後再主動同其他前輩分享，先發現自己經歷嘅嘢原來身邊都有人經歷過，可能大家都對自己有要求，所以先覺得做咩都唔夠好，好似一個必經階段，只係在於你能唔能夠爬番起身。」
雖然已經雨過天青，Winkie回望過去仍慨嘆：「呢行有錫你嘅人，有行過扔低一句說話嘅人，又有叫你學吓邊個邊個咁嘅人，做得藝人自然想人人都鍾意自己，呢個心態好正常，如果你睇得太重、太在意人哋嘅說話，就會好容易唔開心。」
亦因為有這經歷，才造就Winkie今次的新歌：「喺唔開心呢段時間有寫低自己心情，於是就填埋新歌份詞，所以寫呢首歌係紀錄自己。入行咁耐都未試過寫歌、填詞同監製，連MV都有份去構思，我好畀心機學，想畀個交代自己，同一直幫我支持我嘅人。」
後記
首次監製自己的MV，Winkie來個半裸人體彩繪，認真搏命，她說：「好感謝公司讓我瘋狂一次，我一直都覺得自己三十歲前會影一輯人體彩繪。」成就今次MV靈感來自她有一日在家沖涼時：「我除晒衫照住鏡然後就諗，究竟幾多人願意承認自己嘅唔好，好多人包括我都會好好包裝自己，唔想樣衰、唔想承認，要喺人哋面前承認就好似冇着衫一樣，但正係要勇於承認，先會成就一個樂觀同自信嘅你。」
文：曹家誠
攝：劉斌
髮型：Toyo＠The Luxe by PRIVATE i
服飾：Petit Nouveau
場地：CEO Neway