陳細潔男友求婚耍手擰頭
保良局副主席陳細潔（Abbie）昨日出席活動時，被同場的胞姊劉陳小寶（Angel）踢爆其男朋友已開口求婚，可是Abbie則耍手擰頭表示事不關己，還表明兩人一齊開心便可，未必一定要結婚，現階段不是結婚的適當時機！
陳細潔（Abbie）與胞姊劉陳小寶（Angel）昨日齊以老闆身份主持「雪肌蘭健康管理中心」開幕禮，擔任品牌代言人的前港姐冠軍曹敏莉（Mandy）亦有現身撐場，Angel還於活動上大爆妹妹Abbie的男友已求婚，隨即惹來現場一陣歡呼聲！
問到Abbie是否真有「婚」事？她馬上解畫說：「唔關我事，係佢（男友）同家姐講，如果求婚就要嫁，咁咪要嫁好多次？」但Angel則對妹妹婚期表現得非常雀躍：「佢（Abbie）未答，但男方有叫我幫手，係要撥行啲先大機會成功。」Abbie對此表示：「佢係有同我暗示過，但我話唔好講啦，唔好傷感情，（點解傷感情？）大家開心唔一定要結婚，可以食吓飯先，唔使咁快，我以前都有個男朋友，識咗幾個月就話要結婚。（被求過幾次婚？）由細到大都應該有七、八次。」
等化學作用
Abbie透露男朋友是圈外人，二人認識了約一至兩年：「依家係多咗食飯，（家姐撥得好行喎！）只要對方唔係外國人，佢就個個都撥o架啦，（男友差啲咩條件？）唔係條件問題，未係呢個時候，（觀察住先？）其實冇諗過咁快，唔知差啲咩，係好似chemistry（化學作用）咁，一話嚟就嚟o架啦！」問會否預先同居試婚？Abbie表示從來沒有此想法：「其實一個人住咗咁耐，同人住會好唔慣，就算以前同男朋友去旅行都係一人一間房，會健康同靜啲，易瞓得着。」可是，Angel則語帶希望說：「我自己結咗婚差唔多三十年，依家只寄望佢快啲結婚。」
另外，育有一子一女的Mandy表示現已奉獻所有時間給小朋友，早前一家四口更去了悉尼十日旅行，雖然期間湊小朋友辛苦，但最開心係大家一齊睇煙花倒數。
文：名人組