林子善肥仔起肌打走２６磅
林子善花半年時間，由168磅肥仔激減26磅變身成「肌男」，其爆肌相一出，回響甚大，於《東網》點擊率高企，相當受歡迎！連電影監製都被他的Body吸引，決意找子善參演四月開拍之動作電影！子善直言操肌是希望以自己做例子，呼籲大家不要胡亂恥笑別人身材，肥仔、瘦骨仙都可以隨時變靚人！
無綫藝人林子善花半年時間，由168磅肥仔變身做筋肉人，激減26磅至142磅，早前在網上發放爆肌相，好評如潮，《東網》點擊率高企，深受大眾歡迎！而子善的一身肌肉，亦吸引了電影監製的垂青，電影《辣警霸王花》監製黃永峰昨接受訪問，指於《東網》留意到子善的爆肌相，大讚吸引，並盛讚對方做事一向認真，黃永峰表示：「我識子善好耐，佢係天生演員，做乜嘢事都好認真，我好欣賞佢，嚟緊四月我會開拍一部動作電影，都想斟子善演出。」
籲勿以貌取人
林子善對於各界反應如此好，大表感謝，亦很希望參演黃永峰之新片，而談到他操肌的主因，子善表示：「我最想帶出一個正面訊息，就係希望大家唔好再睇小或者用難聽嘅說話去奚落任何肥或瘦嘅人，唔好用外表去衡量一個人，應多給正能量予身邊嘅人，我之前就係因為畀人笑肥仔，令我決心操弗自己，想勉勵別人，只要有心一定做得到！」
談到「肌男」煉成法，子善表示：「因為我要先減肥後操肌，所以最初先打拳減肥、練好啲肌肉，再由教練教我正確嘅玩器材方法，高峰期會一日用三個鐘頭打拳、玩器材再加跑步，飲食方面就以清淡為主，油鹽糖盡量少。」
文：影視組