徐佳琦貪靚求愛 黃美棋恨早嫁
馬國明緋聞女友徐佳琦和藝人黃美棋拍攝賀年特輯，紅噹噹上陣意頭十足，兩女新年除工作上有佳績外，均渴望有愛情，徐佳琦望有正桃花，而黃美棋則希望快些覓得真命天子嫁得出。
徐佳琦（Jackie）與黃美棋日前為莎莎拍攝賀年特輯，兩女首次合作，拍攝時有講有笑，十分投契。Jackie透露新一年將減少模特兒工作，望參與多類型電影拍攝：「希望有好嘅劇本，唔會揀角色，如果導演覺得啱我演嘅就會合作。（性感演出？）劇本需要有一場戲比較性感都OK。（全裸？）咁又唔使咁開心嘅，哈哈！睇劇本啦，劇本好緊要。」
要有責任感
提起與馬國明的緋聞，她即不願多談：「其實嗰陣啱啱初步了解，依家好少見。（有冇新追求者？）希望今年有正桃花啦！而且每個女人都貪靚，愛情亦係好好嘅護膚品之一。」問會否睇相或占卜愛情時，她深信但不會刻意去看，以免被框框限定，而擇偶條件則是對方要有責任感及安全感。
崇尚自然美
而黃美棋與有線主播鍾健威緋聞傳不停，但她一直否認，對於新一年的感情生活，她語出驚人：「我想快啲搵番個老公添，但搵到先得，感情事要雙方磨合到，我肯嫁都要有人肯娶，就算早婚都唔介意，但大前提對方要畀我繼續喺娛樂圈工作。」另外，她透露新一年會打造全新sweet形象，問到可會打針keep靚樣？她即表示自己崇尚自然美。
文：名人組