王梓軒瞻前顧後爭做「樂壇中場」
唱片市道不景氣，但歌手王梓軒（Jonathan）沒有放棄任何一個得來不易的機會，最終順利推出專輯《千色》，更在獎項、銷量和歌曲排行榜都創下佳績，而他亦燃起雄心壯志，望能同時遊走於幕前和幕後，勢要成為「樂壇中場」！
王梓軒在2014的表現亮眼，先有自己製作的音樂電影《千色Fighting For》打入「河內國際電影節」，之後更首奪新城頒獎禮的勁爆男歌手獎，他表示要感謝一班協助他出碟的人，不過就坦言曾有過不出碟的念頭：「2013年我哋有諗過轉模式，唔出碟住，因為市道唔好，有諗過出單曲，之後我哋一有機會就去做，一直改完又改，務求做到最好嘅歌曲！」最後，他好不容易爭取到出碟機會，成績更是有史以來最好。
做反派獲認同
Jonathan唱而優則演，前年開始拍劇後便上了癮：「好感激每個拍攝機會，演戲可幫自己走出框框，我會做好多research，理解到其他人嘅角度。」他又提到在電視劇中飾演反派獲認同大感驚喜：「《飛虎II》其實係我第一套劇，未出街前我經理人好驚，一嚟驚首套表現效果未必咁好，二嚟仲要係反派，但係好感恩，喺努力下交到少少功課，觀眾又覺得合格！」
期待開演唱會
展望今年，Jonathan希望能橫跨幕前幕後，成為「樂壇中場」：「我好enjoy幫其他歌手做專輯或project，其實我已經着手做緊，儲起咗好多歌！」他的另一個目標是想開演唱會：「唱歌日日都有得唱，但為演唱會去閉關鍛煉，我覺得幾過癮嘅，睇觀眾願唔願意畀機會我啦！」
文：音樂組
攝：司徒國榮