陳山聰火爆大逆轉

陳山聰重返無綫後，可謂一劇接一劇，現正播映的《宦海奇官》中，他與馬國明飾兩兄弟，二人官場相遇卻各執己見。山聰坦言不覺拍古裝劇悶，而於《宦》劇中，向來多演奸角的他鮮有演蠢蠢哋的角色，希望觀眾不會反感。山聰亦忙於拍攝古裝劇《張保仔》及《東坡家事》，之後才開拍時裝劇《殭》，與謝安琪齊齊飾演殭屍，山聰指會飾演一隻有型殭屍：「個造型都好認真，之前專登去牙醫度整咗對牙套，劇中都好多特技，同鄭嘉穎都有好多場打戲，而且做得殭屍都一定有邪惡一面，同平時奸嘅演法唔同，所以都係突破。」

全靠意志力

除工作外，山聰還專注跑步，與圈中好友袁偉豪、謝東閔等組成喪跑兵團Crazy Runner，他不諱言跑步令他改變很多：「依家鍾意低調、靜，以前聖誕一定會約friend出嚟開party，今年就留喺屋企睇劇本，跑步令我平衡，識得生活上享受。」山聰之前有不少經歷，他坦言不會後悔，因有經歷才會令人成長，他去年受訪時曾說想生小朋友，再問及此事時，山聰說：「以前曾經講過話唔生小朋友，亦冇諗過家庭呢樣嘢，都錯失咗一啲嘢，但睇到身邊朋友一個一個有小朋友，自己都希望搵個伴，生小朋友，不過呢啲由上天決定。」山聰又指心中仍有一團火，就是享受現時的工作：「以前做嘢目的係得到名與利，依家係享受過程，之前話跑步令我改變，因呢樣嘢係靠意志多過靠體力 。」

陳山聰於《宦海奇官》嘗試演蠢蠢哋的角色。	陳山聰熱愛跑步，參加不少公開比賽。	看淡名與利的陳山聰，學會享受工作過程。

山聰坦言重返無綫後答應過會重新起步，更不諱言：「以前嘅新聞係一世，但唔緊要，點樣活在當下、放下先係最重要。」問到山聰有甚麼是依然放不下？他面色一沉謂：「心裏面係有，有個朋友心裏面係記掛住，見到佢會再say sorry，不過呢啲睇緣分，好多嘢冇得強求。」

文：影視組

攝：李栢儒

化妝：木子維納

場地：金域假日酒店Osteria意大利餐廳