Cammi拖仔斷正 掩面彈開
現年19歲的o靚模謝芷蕙（Cammi），近年「變臉」愈變愈靚，成功覓得內地富二代男友，昨日她和男友穿上情侶裝外套，招搖出巡銅鑼灣，有男友照住，今時今日過着闊太生活的Cammi全程專攻名店，及至發現記者，兩人嚇至分頭閃，搞到Cammi買唔成新袋添！
o靚模Cammi臉變有術，割雙眼皮又打針瘦下巴，愈大愈靚的她，前年成功覓得家族經營服裝生意的內地富二代男友，兩人拍拖年多，Cammi有男友照顧，由過往住公屋的o靚模，搖身一變過着闊太生活，不時於微博晒幸福，晒完靚屋又晒十萬一個的手袋，平日生活不是扮靚便是歎Tea。
全程攻名店
昨日傍晚6時多，Cammi與其富二代男友拍拖外出，兩人恩愛地穿上同款不同色的情侶外套招搖現身銅鑼灣，期間由Cammi帶路全程專攻名店，男友未有多言，一直細心地陪伴在側，不過，連行多間店舖的Cammi都未揀啱心水，及至發現記者拍照，男友被嚇到慌失失，極速彈開，忙亂中他更不停搲頭，而Cammi則用手掩嘴。
求情唔好影
為撇甩記者追訪兩人第一時間分頭走人，於商場內和記者玩捉迷藏，不過行行吓，他們又忍不住會合，期間Cammi代男友向記者求情說：「唔好影佢啦！佢係圈外人。」真係唔好意思，撞破兩人行街，搞到Cammi買唔成新袋添。
文、攝：追蹤組