黃德斌 邵美琪攞命冇得咀

藝人黃德斌與邵美琪（Maggie）昨日為主演無綫新劇《刀下留人》試造型，久未合作的兩人分別飾演劊子手及接生婆，並將發展出一段浪漫愛情，問到有否親熱戲？德斌笑謂：「未睇到，熱血就一定有。我係嚟攞命，佢係迎接生命，係血淋淋的浪漫。」Maggie透露劇中名字叫「花」，德斌則叫「葉」，相熟的二人拍談情戲會否尷尬？她說：「呢套係靠對白同戲嘅感覺幫助，唔係用曖昧嘅動作。（有吻戲？）古裝唔會，佢想表達嘅係更深層，會畀觀眾諗下嘢，唔係咁簡單。」

考慮內地拍劇

繼劇集《當鐵馬遇上戰車》後再擔正，德斌坦言今次責任重大：「壓力自己冇諗，只覺得大家同一條船，做帶頭嘅要划好佢。」提到監製戚其義在內地開劇，德斌直言跟對方有聯絡，問到有否請他拍劇？他說：「到時應該有，睇吓套劇啱唔啱先。（返內地拍劇？）有機會。」Maggie則笑言要「自己搵佢」，問是否想賺人仔？她說：「賺乜都好，有工作都開心，但知佢好多嘢搞緊，我唔敢煩佢住，驚對佢有壓力。」

龔嘉欣冇愛火

同場的龔嘉欣自言首次拍古裝，並透露將周旋於楊明及陳山聰之間，她又笑言很開心與兩位靚仔小生玩三角戀：「現實生活冇浪漫就惟有喺戲入面做吓啦。（現實中想三角戀？）唔係，套劇係講一個男仔默默守護你、好保護你，另一個就成日陪住你、氹你，好開心，惟有喺戲中補償吓。」問到她是否恨拍拖？嘉欣說：「唔恨，唔諗，依家絕緣咗，好似撻唔着，有朋友介紹異性我識，我都婉拒咗，唔知係咪好耐冇拍拖，認識異性嘅心都冇乜。（中途轉「基」？）絕對唔係。」她又笑稱難以想像與山聰拍親熱戲。

文：影視組