張敬軒抓合唱 嘉玲請食檸檬
張敬軒被邀主唱舞台劇主題曲，可惜未能如願與劉嘉玲合唱，雖感遺憾但仍「希望在明天」。談到即將舉行的《勁歌》頒獎禮，已五年沒有出席的軒仔直言一定撐場。
劉嘉玲、梁家輝及謝君豪主演的英皇舞台劇《杜老誌》將三度公演，大會昨安排傳媒採訪綵排，家輝卻因工作關係逗留台灣未能現身，而張敬軒則負責演繹主題曲《不夜場》。有指該曲原本有意安排軒仔夥拍嘉玲合唱，但最終由於時間匆忙而告吹，軒仔表示：「唔緊要，佢哋會rerun（再公演），一定仲有機會嘅。」
久違《勁歌》
已五年沒有出席過《勁歌》頒獎禮的軒仔，直言今年會現身支持。談到早前他出席其他樂壇頒獎禮的造型涉及政治成分，他笑說：「打扮會因應場合，《勁歌》嗰晚（造型）會源自第一次喺該頒獎禮得獎時嘅造型。（拍吓劇修補關係？）我公司（英皇）同無綫嘅關係並不如外界寫得咁差，仲好好添，畀啲時間同空間佢哋培養感情，總之我之前做慈善騷，都被安排唱足6、7分鐘。」談到好友房祖名於北京候判，軒仔表示：「希望佢明白一啲道理。佢係聰明人，好關心朋友同有禮貌，今後能夠變成更加出色嘅人。」
夢想上太空
至於劉嘉玲透露稍後將返回內地參與節目《造夢者》的錄製。談到夢想，她笑謂：「我希望各方面都仲可以重新定位，或者能夠上吓太空，人一世物一世嘛。（叫偉仔陪你？）佢比較細膽，冇得逼嘅。」對於房祖名候判，嘉玲呼籲大家要給他改過機會：「人誰無錯呢？我都成日犯錯啦。」
文：影視組