苗僑偉肉麻驚喜 咀喊三嫂
苗僑偉（三哥）前晚為慶祝老婆戚美珍（三嫂）53歲生日及二人的25周年結婚紀念，假跑馬地賽馬會舉行驚喜派對，圈中好友、好兄弟如劉嘉玲、林峯、黃日華、張兆輝等都有到賀！三哥於席上不但大唱情歌，更以肉麻說話「冧」老婆，多謝三嫂陪他度過每一個寒冬及給了他一個幸福家庭，令三嫂感動爆喊！
出名恩愛的苗僑偉及戚美珍結婚25年，三哥特意於前晚三嫂的正日生日，假跑馬地賽馬會大搞驚喜派對！三哥自爆精心挑選賓客名單，誠邀圈內及圈外的各方好友為老婆慶生，包括劉嘉玲、曾志偉、譚詠麟、林峯、鄭則士、洪天明與周家蔚及兒子、謝天華夫婦、文頌嫻、姚樂怡、余安安等，當然亦有一班他的好兄弟黃日華、湯鎮業等。
畀咗個幸福家庭
三哥更一早與索爆大女苗彤入場打點一切，例如擺放設計特別的「苗僑夫與苗僑Ｗife」布景板等，而身在外地的細仔苗俊則未有返港。據知三哥為三嫂準備「銀婚蛋糕」及請來黃日華及湯鎮業齊齊上台獻唱，令對方「冧爆」灑淚。其後三哥於受訪時肉麻地感謝老婆多年的窩心陪伴：「我近年多數喺外地做嘢，好奔波、好凍，我想多謝老婆陪我度過每一個寒冬。（當眾錫嘴？）成班老友要求我哋咀，我哋感情不嬲好好，咀嘴一啲都唔出奇，好多謝佢畀咗個咁幸福嘅家庭我！」
《越難越愛》表心意
談到生日禮物，三哥直言三嫂一直期待他與同期打拚多年的兄弟飯聚，他更唱出歌曲《越難越愛》以表愛意：「我有叫埋偉仔（梁朝偉）嚟，可惜佢要喺北京做嘢，所以由嘉玲做代表。成晚以唱歌為主，做和音嘅我仲邊唱邊企，企到腳痛都唔知！」
至於張兆輝就自爆趁拍劇空檔抽空到賀，林峯則帶酒獻禮，而謝天華亦扶實腹大便便的太太到場，分享喜悅。
文：影視組