劉心悠佳人冇約連食兩餐

心悠透露除夕夜在工作中度過，更因而被母親催拍拖。

藝人劉心悠昨日身穿紅色碎花長裙出席時裝樓層開幕禮，還即席分享扮靚心得及與觀眾大玩Selfie，令現場氣氛高漲！她續透露日前除夕夜於工作中度過，沒有參與任何倒數活動慶祝：「因為呢排宣傳緊電影《小姐誘心》同拍緊《有客到》，所以都冇同朋友一齊倒數。同埋我嗰晚做完Paco（黃柏高）飯局已經好飽，返到屋企又食埋媽咪嗰餐，連食兩餐飽到不得了。」

儲夠100K挑戰全馬

問母親在新一年有否催促拍拖？她坦言：「都有催過嘅，不過唔係日日囉，我哋經常討論去邊度玩同旅行多。（努力搵番個男友？）唔會努力啦，呢啲努力唔到。」她又謂在2015年只有兩個願望：「第一係完成今個月25日嘅馬拉松十公里賽事。（第幾次跑？）今次第九次啦，我諗住完成一百公里（100K）先去挑戰全馬。」

心悠與主持宋熙年大玩Selfie。

表明不會落力搵伴的心悠，寄望事業更上一層樓。

心慌慌入大酒店

正忙於電影拍攝的她，續透露第二個新年願望是工作非常順利：「我依家一直拍緊電影《有客到》，之前都去咗『大酒店』（殯儀館）開工，仲連開二十個鐘。因為嗰度原本唔畀拍，所以一拍得就連續拍快啲囉。我去拍之前都好驚，嗰場係我自己角色嘅喪禮，所以都拜晒神先去拍。（現實中有冇遇過詭異事件？）好彩又真係冇遇過呢啲事。（見到自己張靈堂相感心寒？）其實都有心理準備，仲會去諗第時自己會唔會咁！」文：名人組