鄭希怡吸金搵命博 佗B潛水
預產期為四月的鄭希怡（Yumiko）母憑B貴，腹中塊肉帶旺她短短一個月勁賺六位數，雖然懷孕期間丁財兩旺，但她繼續毫不錫身，不惜化身成搏命媽咪「潛」行吸金。Yumiko在接拍內地劇集期間無懼動胎氣，犯足大肚婆三大禁忌，包括「2℃捱冷」、「缺氧潛水」及「危跳臭河」，可謂以身犯險賺奶粉錢！
鄭希怡與化妝師老公梁學儲去年九月在港補擺喜酒，當時內地導演藍志偉上門力邀她為暫名為《古鏡》的新劇做主角。劇集以苗族為故事背景，男主角是內地演員應昊茗，需拉大隊到湖南拍攝，最終Yumiko被導演誠意打動，加上酬勞高達七位數人民幣，因而決定接拍。
愛情事業兩得意的Yumiko喜事停不了，去年11月赴內地拍攝時發現身體有異，及後才得知已懷孕三個半月。劇集有兩幕跳水濕身戲，有大有細的Yumiko擔心身體未能負荷，曾與導演討論改劇情，不過最終導演堅持跳水戲尤關重要而未能刪戲，敬業的Yumiko硬着頭皮頂硬「跳」！
四米水底閉氣
第一幕落水戲在湖南懷柔拍攝，Yumiko一次過犯足幾個大肚婆禁忌，當日氣溫只有十多度，她包到實做足護胎工夫，但之後需跳落郊區一條污濁臭河，由頭濕到落腳，並要在水中掙扎，危險度爆燈。她上岸後工作人員大為緊張，立即送上毛巾保暖。
完成第一關後，另一場潛水戲難度更高，導演考慮到Yumiko健康狀況，決定全劇組在懷柔等待天氣回暖才拍攝，可惜天公不作美，苦等20天後決定轉陣到北京，租借專業暖水游泳池。今次戲份相當危險，Yumiko父母特意赴京監場，(目及)實愛女及寶貝孫。拍攝當日，Yumiko未有配備氧氣筒等潛水裝備便深潛四米，期間需頻頻閉氣，有潛水牌的導演更親自下水拉實Yumiko雙腳，最終拍近20 Take才順利完成，有驚無險。當時北京氣溫低至兩度，為免捱冷，Yumiko全日大多時間都浸在暖水保溫。最終她為劇集拍攝一個月才回港專心安胎。
拚命回饋伯樂
對於今次「博兩命」拍劇，Yumiko接受本報電話訪問時說：「呢個導演係我伯樂，我當年第一套大陸劇都係佢做導演，今次新劇佢揸弗，所以一定要拍，我係『拚命三娘』！」問到拍攝前可有詢問醫生意見？她坦言曾隱瞞醫生有潛水戲：「醫生話孕婦游水冇問題，但唔敢問佢潛水有冇問題。」又直言母親曾擔心得兩晚失眠，幸老公給予她無限支持，Yumiko表示自佗B後吸金冇停手：「個B好旺我，12月有成十單商演搵我，每個都有六位數字酬勞，但我個肚開始大，好重，所以對工作都會揀擇啲，地方太遠同人多都唔接。」有傳今次Yumiko佗女，她故作神秘說：「唔講住，下次先啦，但老公知道個B性別後好開心。」
Yumiko經理人霍汶希在長途電話說：「我有要求Yumiko唔好拍，亦同導演交涉過用替身，但導演話唔可以，我有諗過撻訂唔做，但Yumiko覺得既然之前都拍咗咁多，唔拍對劇組好唔公平，佢覺得都過咗3個月（懷孕）穩定期應冇問題。」霍汶希為安全計特派同事到拍攝現場照顧「大肚婆」。
文：音樂組