苟芸慧避鏡頭 弟發難箍記者
自言恨拍拖的苟芸慧，踏入新一年即急不及待夜蒲獵仔，更相約單身貴族胡杏兒及胡定欣狂歡！惟入夜店前，苟芸慧細佬卻因記者要求影相而發難，箍記者頸之餘又想搶手機，更斥記者無禮，要出動夜店保安隔開才平息事件，苟姑娘惟有代細佬耍冧！
苟芸慧前晚在荃灣出席完倒數活動即趕到中環，會合細佬及一名女性友人夜蒲賀元旦。昨日凌晨約二時，苟姑娘一行人準備上夜店狂歡，苟姑娘見記者舉機即避鏡頭，記者追到大堂，問她可否企定影相，她繼續迴避。此時苟姑娘細佬突然發難，想搶走記者手機，混亂間更箍記者頸，驚動幾名夜店保安幫忙隔開兩邊，期間苟姑娘細佬激動大叫要求記者刪除相片，更斥記者：「冇禮貌！」苟姑娘即向記者道歉，再上樓狂歡。
黃榕出擊失敗
據知苟姑娘約了單身的胡杏兒、胡定欣，以及單立文（豹哥）與太太胡蓓蔚，包下VIP包廂開派對，苟姑娘玩了一輪先行離開。豹哥豹嫂於凌晨四時半走人，至約五點半，定欣與幾位女友人同坐七人車離開，相信杏兒亦在車上。
前晚亦見34歲生日的黃榕晒三吋事業線獵仔，同行的Karl指黃榕主動溝韓仔失敗，而何佩瑜也有現身。據知，傅明憲及四洲集團太子女戴凱欣都在夜店內。
傳訊息予城城
而苟姑娘在倒數活動上表示想拍拖：「睇緣分，依家想身體健康，唔好急最緊要快。」又謂病情已好轉，藥量亦大減。對於郭富城近日的負面新聞，她表示不便回應，但有傳賀新年訊息予對方。
文：專案組