陳豪再追B求生女秘方

已有一子的陳豪前晚現身倒數活動,透露懷孕7個多月的太太陳茵媺(Aimee)情況良好,笑指夫婦二人意見一致想多個女,更欲尋求生女秘方,而開晒口表示想物色男朋友的胡杏兒,則坦言與幾名追求者認識中,為免被傳媒追訪,故仍未開始單獨約會!

陳豪、胡杏兒、台灣歌手黃鴻升(小鬼)、朱千雪、鄧佩儀等前晚出席上水廣場舉行的「華麗倒數派對迎15」活動,吸引大批粉絲到場舉牌支持,而帶同母親到場的陳豪,齊齊穿上紅地服飾,不過陳媽媽卻怕醜得不斷迴避鏡頭,就連站於台上的陳豪也拜託傳媒「放過陳媽媽」,場面惹笑!

老婆佗得舒服

心情大靚的陳豪笑指活動地點與其位於大埔的家很近,收工後可飛奔返家湊仔,談到懷孕7個多月Aimee,陳豪透露太太剛覆診完,情況相當理想,他謂:「佗得比上次舒服,係個肚大咗,唔太辛苦,整體上係健康同開心,大仔依家一歲,所以要灌輸佢知有個細佬嚟緊。」

對於Aimee近日表示想追個女,陳豪得戚地謂:「係我講先o架!不過大家想法都一致,要多個女唔大問題,有個女係開心。(會唔會向人請教生女心得?)都想,但會畀Aimee休息吓先。」

胡杏兒有對象

而杏兒被問到新一年是否希望搵到男朋友?她靦腆地指感情事不能強求,故一切隨緣,問到有否與追求者約會?她謂:「認識緊,不過一陣都係返屋企,總之落實咗唔呃你哋,依家都有幾個認識中,係圈外人嚟嘅,邊有圈內呀!(有冇出街約會?)冇呀!邊度出到,會有狗仔隊跟o架!」近日忙於廣州拍攝真人騷的她,笑指對酬勞感滿意,但拍攝期間卻搞到周身傷,她謂:「好多瘀傷,不過都開心,個節目一月中就播,我賺嘅都係辛苦錢嚟o架!」

至於早前完成電影《角頭》的小鬼,為角色要留鬍鬚,因粉絲不喜歡已剃掉,對於被粉絲投訴少來香港,小鬼大呼冤枉謂:「我在台灣以外都來香港,常常來!(有粉絲拍到你去逛街?)我都是抽空去,都沒有買東西!」

文:影視組