千嬅柏豪 喊爆奪金

昨晚派發第二張樂壇成績表「2014年度叱咤樂壇流行榜頒獎典禮」，祖兒、千嬅、謝安琪、張敬軒、許志安、薛凱琪、周柏豪、吳雨霏、李克勤等半百歌手出席，陳奕迅（Eason）、古巨基及鄧紫棋等均缺席，千嬅、祖兒、謝安琪、許志安、張敬軒、C AllStar、RubberBand及林奕匡各得兩獎齊齊好事成雙。

相隔十年再封后

全晚一共頒發43個獎項，女歌手金獎由千嬅與祖兒兩位天后爭崩頭，最終由出道廿周年的千嬅相隔十年再度封后，亦是她第四次奪得此獎。千嬅激動地說：「我好驚，點解咁，我應該好冷靜，但原來唔係。哇！十年啦，度過咗好有回憶嘅雙十年『嬅』，呢件事好變態，我以為自己力大無窮，可以保護家人，其實心口冇乜嘢，勇字愈放愈大。」

周柏豪奪男歌手金獎，喜極而泣。

薛凱琪奪女歌手銅獎，大為感動。

千嬅續說：「我走過好多高山低谷，每次高山低谷最後都係一個高峰，走過高山低谷嘅人比一次上高峰嘅人體力會大咗好多，智慧多咗。『Working MaMa』唔易做，多謝先生、我個仔畀咗好多能量我去工作、成長，年紀愈大我愈珍惜，因為生命倒數緊。」

容祖兒年尾才發力奪得女歌手銀獎，她坦言份外珍貴。	許志安憑《流淚行勝利道》奪至尊歌曲大獎。	謝安琪勇奪我最喜愛的女歌手，並指《獨家村》內容反映人生。
李克勤向台下新人作自我介紹。	2014叱咤樂壇流行榜頒獎典禮 得獎名單

而去年頭專心養病，年尾才發力的祖兒奪銀獎，她說：「呢個獎同以往嘅獎一樣咁重視，份量咁珍貴。大家可能覺得我去年少產量，但我為咗家人打咗場唔易打嘅仗，我媽咪由四月到九月唔舒服，有掙扎過做嘢定照顧屋企人重要啲，我揀咗屋企人。會送呢個獎畀媽媽，希望大家身體健康。」銅獎則由薛凱琪喊爆奪獎。

安仔奪至尊歌曲

至於男歌手方面，2007年出道的周柏豪成功鍊贏一眾前輩，首度成為叱咤男歌手金獎得主，眼濕濕的柏豪哽咽：「拎呢個獎有無比壓力同緊張，依家有啲暈，我需要啲叫聲，有聲就會定。」至於銀獎得主安仔說：「唔講唔知，我1986年入行，祖兒話佢6歲，可以坐你隔籬我賺咗。」

許志安事隔十年，憑《流淚行勝利道》再奪至尊歌曲大獎，安仔感觸地說：「我唔想只係大家阿爸、阿媽、家姐、阿哥識得我，我想你哋都識得我，由呢刻開始。一首歌可以陪住大家經歷高高低低，但一個歌手喺個台上未必留得低。」

文：音樂組