清穗久美子今年目標搵老公
名模Mandy Lieu公司旗下34D日模清穗久美子（Kumiko）自言2014年對她來說是大豐收的一年，去年推出的寫真集賣到滿堂紅，成功彈起，踏入2015年Kumiko特別在彩色氣球上寫上「2015快樂」的祝福語句，祝願大家於新一年開心快樂，戾氣全消。
而新一年她已有滿腹大計：「有朋友做時裝，我想試吓設計手袋同衫。仲想拍多啲MV同電影，但首要係學好啲廣東話同普通話先。」談到新年願望，已單身近四年的Kumiko希望可以脫離單身行列，她坦言：「我想搵個好老公，但必須搵個男友先。（識個香港男士做男友﹖）初到港有個香港男友，但只係拍咗一個月拖，之後都係台灣男友。」
另問到迎接新年的節目？Kumiko稱會留在香港，跟朋友舉行派對，欣賞煙花及倒數。