阿嬌預告Twins合體送驚喜

阿嬌在前年台灣綜藝節目上不慎脊椎受創，之後「坐空櫈」又跌到盆骨移位，搞到周身傷連醫生都話「冇得醫」。過去一年，阿嬌飽受痛楚，她坦言：「成日失眠，由一塊熱貼依家要加到兩塊，一直都有睇復位同骨醫，都睇好幾個，好多時真係痛到要食止痛藥，有時瞓唔到都要食安眠藥，屋企人都叫我唔好食咁多……我都知唔好，所以公司都為我着想，減產之餘，亦爭取時間盡量睇醫生。」

改名自我感覺良好

面對周身傷患難免感到諸事不順，阿嬌直言：「身體唔順（利），好多嘢都好難順（利），好多都好困難，喺內地有幫我按摩師傅同我講，話咁多藝人搵佢，我係最嚴重嗰個，佢提議幫我用錘仔敲番直條腰，但我真係唔敢試。」談到阿嬌將「鍾欣桐」改為「鍾欣潼」可有助運程？她笑言：「其實改名係自我感覺良好，『鍾欣桐』都係個藝名，只係我覺得『桐』字畀人感覺好恬靜，同我性格好唔襯，自己就諗咗呢個『潼』字，好唔好我唔知，但只知麻煩到啲fans要改燈牌啫。」

阿嬌接受專訪時大談脊椎受創的痛楚。

阿Sa（右）和阿嬌組合的Twins今年會有大搞作。

今年是Twins成軍15周年，對阿嬌和阿Sa（蔡卓妍）來說極具意義。阿嬌開心說：「我都講過好想同阿Sa出新碟，加上今年係我哋15周年，公司已經有一個計劃畀大家驚喜。（Mani話你哋拍真人騷？）佢已經拒絕咗我去外國拍，其實我同阿Sa好少一齊去外國拍嘢。（24小時捕捉你哋一齊起居飲食？）始終女仔人家會好尷尬喎。」講到謝霆鋒的《十二道鋒味》也是在歐洲取景？阿嬌不禁謂：「唉……佢係霆鋒嘛，搵咁多錢唔同嘅！」

恭賀阿Sa再奪影后

至於阿Sa剛憑電影《雛妓》於「澳門國際電影節」奪得最佳女主角，昨日阿嬌在微博祝賀好姊妹：「恭喜我的小SA SA我的影后，你最棒棒。」阿Sa亦給阿嬌回一句：「謝謝妳啊，我的大美人。」踏入2015年，阿Sa亦坦言期待Twins的15周年合體大計劃順利成功，讓一直支持Twins的歌迷喜歡。談到她繼《妄想》後再次榮升影后，阿Sa稱2014年為這部電影付出不少心血，期望今年是收成的一年。問她會否再下一城在其他電影頒獎禮上奪獎？阿Sa謂：「唔諗呢啲，反而希望藉電影令大家關注雛妓嘅社會問題。」談到與男友陳偉霆的感情？她即冧笑說：「一路都好啦。」

至於Twins經理人霍汶希昨日接受電話訪問時透露「Twins合體騷」的進程：「預計今年底喺紅館舉行跨年騷，目標係四場以上，騷內會講番Twins 15年嚟甜酸苦辣嘅成長過程，係笑中有淚，佢哋仲會易容，一定好好睇，（會唔會表演經典側手翻？）乜都有，之後仲會舉行內地巡迴添。」她又說因為此騷是英皇今年大project之一，故必定會不惜工本製作，更有一連串宣傳、節目及製作配合，除會再推出Twins專輯外，還會一同亮相內地真人騷。

此外，阿Sa日前參與一套內地的明星體驗真人騷，擔任「臨時媽媽」帶「女兒」深入熱帶雨林，為任職護林站長的爸爸送飯，途中更驚遇螞蝗襲擊及吸血。

採訪：音樂組

攝影：張福宏

化妝：Circle Cheung（ndnco.co）

髮型：Davy Yu@salon amarone

服裝：MOSCHINO@I.T.

場地：GATEWAY HONG KONG HOTEL