蔡少芬除夕遇扒手重獲銀包失萬元嬲爆
蔡少芬（Ada）昨日帶同兩名女兒到迪士尼歡度除夕，懷疑遇上扒手，荷包不翼而飛，正當她欲報警及補辦各類證件之際，卻收到樂園來電，指有內地人拾獲她的證件，但名牌荷包內的萬元現金已無影無蹤。事件峰迴路轉令Ada經歷了心情高低起伏的難忘除夕，不過她仍然感恩及樂觀地說：「起碼cut剩一張信用卡同車牌，仲有得用住先吖！」
「廿四孝媽咪」蔡少芬昨日帶同兩女及三姨到迪士尼樂園歡度除夕，雖然這已是她本年度第N次帶女兒遊園，今次卻懷疑遇上扒手，當Ada發現荷包不翼而飛後，她在微博上寫道：「今天遇上扒手！竟然在迪士尼！我的銀包被偷了！要cut晒所有卡，申請身份證、回鄉證、駕駛證！真的好嬲，世界上好多的不辛（應為「幸」）都是從人為而來！但願那些壞人能夠早日做回好人，世界才能夠和平！2014我仍然感恩，這一年都是美好的！2015盼望所有壞人都變好人！」
好心人助尋回證件
結果，當Ada疊埋心水報警及補辦各類證件之際，「好人」出現了，Ada說：「當我排隊諗住補辦車牌，就收到樂園嘅電話，話有人執到我啲證件，嗰時我已經cut剩一張信用卡，回鄉證同身份證都全部停晒，聽日（2日）我就要返內地做嘢，元旦日紅假搞補辦又麻煩，所以要快快搞掂啲證件，依家cut剩一張信用卡同車牌，起碼我仲有得用住先吖！冇咗成萬蚊現金，又唔算好多，算係不幸中之大幸！（荷包好名貴？）係名牌，我舅父送畀我，好有紀念價值。」
Ada又說要表揚拾獲證件的內地遊客：「佢話畀我知，話當時佢喺噴水池附近同個女玩緊，見泥地上面有堆證件同信用卡，望到證件上面有我個樣，於是報畀樂園保安知。（點答謝對方？）我本來都想有啲表示，又想同佢合照表揚佢，但佢婉拒咗，加上我個女又嗌肚餓，搞到我都忙到一頭煙。」
多謝樂園提供協助
失物有限度失而復得，Ada說：「其實樂園方面都提供咗好多報失電話同資料畀我，好幫手！不過，我覺得佢哋喺保安方面有少少可以改進，我覺得我應該喺檢查袋嗰個位置畀人打荷包，因為我唔見咗嘢之後，已經報咗警，當時有個警察在場，問我仲追唔追究？我唔追究，但想睇閉路電視影唔影到個小偷，但樂園方面覆番，話啱啱個鏡頭pan咗去另一邊，影唔到。其實嗰個位都好重要，可能有人會帶危險物品入場，個鏡頭係咪唔應該pan來pan去呢？」本報向迪士尼公關查證有關事宜，迪士尼發言人指不便回應個別事件，樂園一直致力維持治安及保障賓客及其財物之安全。
文：影視組