朱晨麗打入影壇 情迷張家輝

備受力捧的朱晨麗近年不乏演出機會，她坦言感激《八卦神探》監製張乾文的器重：「第一次試打戲，好多謝監製安排同信任，幫我發掘咗新戲路，出嚟反應好好。今次仲捲入一場四角戀，感情戲都有挑戰。」朱晨麗坦言打女之路絕不好過，為拍劇接受兩個月魔鬼訓練，後來在電影《賭城風雲2》中飾演保鏢，對吃慣苦頭的她而言可謂如魚得水。而更難得的，朱晨麗笑言是有機會與偶像家輝合作：「今次喺戲裏做佢貼身保鏢，真係好驚喜，估唔到我要保護一個猛男！當初拍劇我都有參考佢嘅《激戰》，角色都有少少抄佢。仲有神級嘅發哥，佢真係nice爆，佢話有留意TVB劇集，連劇情都講得出，當然要請發哥支持《八》啦！仲有把握機會集郵添！」

向萬能演員偷師

而在朱晨麗印象中的家輝，可謂是120分好男人！她說：「好鍾意家輝哥，佢係一個好專業、好萬能嘅演員，今次合作都把握機會偷師。同時佢又係一個好男人，我曾經同娥姐（關詠荷）合作《情逆三世緣》，見到佢同屋企人好sweet，聽講家輝哥仲會喺節日探娥姐班，真係好幸福，好羨慕呀！（係咪視家輝為擇偶條件？）冇第二個家輝喇喎！」

朱晨麗把握機會向家輝偷師演技，又坦言羨慕對方有一個幸福家庭！

朱晨麗笑言要向nice爆的發哥推介自己的劇集。

化妝：Soie Ip

服裝：TED BAKER

髮型：Philip Lee@LA BIOSTHETIQUE

場地：星影匯 The Metroplex

文：影視組

攝：劉斌