老竇贏頭馬 Kelly屈食飯
陳慧琳（Kelly）父親陳崇偉名下愛駒「鑽石巨匠」昨日大熱奪冠，贏到開巷的陳爸爸大晒彩票拉頭馬，Kelly亦趁機屈老竇請食飯！但有人歡喜有人愁，楊千嬅奶奶黃淑貞雖然三代同堂有丁子高及愛孫Torres現身打氣，但愛駒「野孩子」最後卻未能跑出。
昨日賽馬日吸引不少名人現身馬場，陳慧琳父親陳崇偉穿上一身棗紅色戰衣，為有份出賽的愛駒「鑽石巨匠」打氣，陳父在大戰前夕喪刨馬經研究，一副專家模樣。最後「鑽石巨匠」不負厚望，大熱贏馬，陳父開心到忘形晒Ｖ，又騷出贏馬彩票，相信今仗「執唔少」落袋，最後笑到四萬咁口的他與其他馬主齊齊拉頭馬，可喜可賀。
「野孩子」未旺「丁」
事後本報致電Kelly，她竟未知爸爸已做馬主兼贏頭馬：「唔知爸爸入咗馬場，唔太清楚佢做咗馬主，我對博彩都冇興趣，亦冇興趣做馬主。不過知道爸爸贏頭馬都會好開心，我會搵佢請食飯。」她又說甚少到馬場，認為小賭可怡情：「我都冇賭癮，知道爸爸係識馬之人，我最大嘅心癮都係唱歌同湊仔。」
楊千嬅奶奶黃淑貞名下愛駒「野孩子」亦有份出戰，適逢昨日是馬會親子活動日，丁母與兒子丁子高帶埋孫仔丁進諾（Torres）入場見識，千嬅因人在北京工作故未見身影。戴上老鼠耳冷帽的Torres在包廂席晒天然呆萌樣，當丁子高手抱他到看台時，Torres一見到賽馬更興奮手指指，相當可愛！可惜最終「野孩子」未能旺「丁」旺財，無緣讓Torres一嘗拉頭馬滋味。
Torres低頭玩手機
雖然愛駒未能跑出，但丁母有孫萬事足，索性弄孫為樂帶Torres飲茶醫肚，期間Torres掛住做「低頭族」玩iPhone，唔理嫲嫲。此外，藝人何傲芝昨日無懼寒風，「胸」降馬場為nowTV拍攝節目，性感裝扮相信令全場馬迷精神為之一振。
文：音樂組