Cara G.教愛女 玩轉童年
今年三月誕下萌娃India的混血名模Cara G.，透露這個聖誕節是一家三口首次一齊過，可謂意義重大，因此老公Jesper打算帶囡囡到美國睇雪兼與爺爺嫲嫲齊過白色聖誕；兩人並有相同意念，以「玩」來培育愛女成長！
首次一家三口過聖誕，Cara與Jesper打算帶India飛美國同爺爺嫲嫲一齊過白色聖誕：「今個Christmas會同家人一齊食吓嘢、行吓街。而且今次係India第一次睇雪，相信一定會好開心！」
India好趣致
表情多多、十分趣致的India，是Cara口中的「perfect baby」，平日總是皺起眉頭、帶着好奇心去探索世界的一切，而且平時最愛聽故事，不足一歲的她更會聞歌起舞，Cara表示：「我覺得對小朋友嚟講，『玩』係最好嘅教育，畀佢哋自己去感受、去嘗試，即使唔跟規矩都可以。」Jesper笑言補充：「唔係要India去破壞規矩，只不過我覺得人生好長，而當佢哋長大之後有太多知識要學，亦有太多規矩要守，所以我哋希望畀India有一個快樂童年。」
同為模特兒的Cara和Jesper，近年亦開始兼顧果汁店及攝影師的工作，非常忙碌的二人卻有一個默契，Cara透露：「我哋上班時間都好自由，我哋會確保總有一個人可以陪到India。即使有時候我哋要飛去其他地方做嘢，我哋亦會帶埋India一齊去。」
堅拒做星媽
樣子可愛的India相信有不少廣告代言搵上門，但Cara卻堅拒做星媽：「雖然我好enjoy同India一齊做嘢，除非佢大個咗之後自己決定，但就唔會考慮畀佢做童星，我希望佢有一個快樂童年。（生多個？）將來一定會再生！因為我好享受做母親呢個身份！」
場地：香港迪士尼樂園
文：專案組
攝：吳文聰