馬詩慧助夫經商計唔掂數

馬詩慧（Janet）昨日與長女王曼喜及孻仔王躍穎，齊齊出席Cafe開幕活動。同場嘉賓還有余安安和一對女兒李文琪和李文騫，及模特兒陳祉妤等。問到Janet可會想做生意，她說：「做生意好大壓力，見我老公就知，想成事要擺好多時間同心血落去。（老公間店開咗未？）開咗，不過仲未Grand opening，我都會幫吓手。（幫手管數？）管數唔得，我數學好差，讀書時數學唔合格，我哋成家嘅數學都好差，會搵人幫手。」

情到濃時做番自己

提到女兒曼喜日前又被拍到與女友Lia在街上咀嘴，對此Janet說：「Just kiss啫，無所謂。情到濃時，無乜大不了，唔係好激嘅行為。曾幾何時我哋細個都做過，如果係好激就要收斂。由始至終唔係罪，既然佢公開咗，點解唔可以做番自己？喺街咀嘴我同Michael（丈夫王敏德）都會，依家都會，更何況係廿幾歲。同埋Lia今年唔喺香港過聖誕，尋晚飛咗，曼喜尋晚返嚟都唔係幾開心，不過佢好快會冇事。」

余安安等飲女婿茶

而余安安就表示大女文琪在港當律師，細女文騫仍在美國升學，現放假才回港。問到兩女會否想入娛樂圈？安安說：「從來冇諗過，咁辛苦。我帶過佢哋跟我去開工，試過兩次都拍通宵戲，畀佢哋知道呢行唔係表面咁風光，要捱夜。」她謂細女畢業後可能會留在美國發展事業，雖然掛念，但有一個女兒在港陪她就好。她又透露兩個囡囡都有拍拖：「細女男友喺美國，所以無見過。大女男友就成日嚟屋企食飯，話我啲飯好食。（擦你鞋？）我都擦佢鞋，佢煮嘢非常好食，過時過節就會煮大餐，我話佢第時退休可以做私房菜，依家做住我嘅私人私房菜先。（視佢為未來女婿？）慢一步先，應該會嘅。」

文：名人組