趙頌茹冬至冇情講 拒夫見囡囡
藝人趙頌茹（Yu）昨日單拖出席活動，對於被判襲擊罪成的老公周永恒（Roy）開到聲指冬至想見兩個女，阿Yu直言基於小朋友安全問題及牽涉到案件，為免妨礙司法公正，暫時雙方不能聯絡，但Roy昨日卻指法庭並未有頒令禁止他與女兒見面，認為阿Yu做法對他及兩個女兒不公平。
趙頌茹（Yu）、陳爽、黃紫盈、王宗堯等昨日出席鞋履活動，見阿Yu單拖到場，問為何沒帶兩個囡囡同行？她笑言因穿上高跟鞋，為免裙拉褲甩才沒有與兩女同行，更指平日帶囡囡出行也會穿上平底鞋。談到老公周永恒表示希望今日做冬見到女兒，阿Yu說：「其實佢唔可以聯絡到我哋，因為入面牽涉到案件，兩個小朋友安全要保護，做父女係一世關係，所以處理咗當前嘅嘢先，唔可以妨礙司法公正。（依家咪好清靜？）幾好，好舒服。」
對於阿Yu指Roy不能聯絡她，阿Yu經理人接受電話訪問時，表示阿Yu聽從社工意見，基於案件尚未完結，阿Yu亦是照顧兩個女兒的負責人，故不方便帶女兒見Roy。而Roy昨日亦就阿Yu言論接受電話訪問，他說：「法庭根本冇頒過禁制令唔畀我見兩個女，社工亦從來冇聯絡過我，件案係兩個大人嘅事，一開始係念親情先畀兩個女阿Yu照顧，但依家搞到自己見唔到個女，佢嘅做法對兩個女同我都唔公平。」
陳爽餵人奶有壓力
同場的陳爽產後首度復工，收身不少，她透露出席活動兩小時內不會掛念囝囝，但超過期限便會很想返家，可習慣湊仔生活？陳爽笑說：「好好，依家個仔兩個月6公斤，餵人奶，但佢好為食，4、5個鐘就要食一次，搞到我都有啲壓力。（老公有冇買嘢獎勵你？）有BB已經滿足，平時我要咩老公都會買畀我，所以依家冇特別嘢想要。」更讚老公平日有幫囝囝沖涼及抹pat pat，但何時生第二胎則隨緣。
文：影視組