郭奕芯崔碧珈胸狠防狼

模特兒郭奕芯（Ashina）今年推出三本寫真集而人氣急升，有「G奶謝安琪」之稱的性感女星崔碧珈（Anita）則憑超豐滿身材極速上位，片約不斷。兩女樣靚身材正，出席聖誕party難免被「有色之士」虎視眈眈，她們直言曾有不愉快經驗，自此要加倍提防。

Ashina表示曾在夜店慶祝平安夜時被鹹豬手伏擊：「因為地方太窄，啲人有意無意掂你，現場又嘈，鬧都冇用，有次有男人突然拖實我，之後一嘢攬住我，摸到我胸部，我好嬲即刻推開佢！」在英國留學的Anita曾目擊好姊妹遭抽水，幸得她及時相救：「我個friend飲咗兩杯之後唔舒服，我見佢行開咗好耐，於是去搵佢，發現有幾個男仔對佢毛手毛腳，我即刻拖佢走！我就自細已經畀屋企人訓練酒量，所以冇試過醉咗畀人博懵。」

單身的郭奕芯高呼dry爆求愛。

崔碧珈夜蒲時勇救好姊妹。

閨房P玩素顏

兩人提起不快事均猶有餘悸，奉獻各位姊妹要好好保護自己，Ashina認為去夜店不應穿得太性感，亦要避免獨自一人：「其實我唔係成日去玩，揀男友亦唔會喺夜場識，冇咩安全感，都係少去夜店為妙。」Anita近幾年選擇與最要好的朋友在家中開P，甚少夜蒲識陌生人：「我啲party唔會太隆重，大家都冇咩打扮，甚至唔化妝，淨係同信得過嘅朋友玩。」

心思思求驚喜

講完慘事，兩人大談浪漫聖誕，Anita表示曾與舊男友在家中玩煮飯仔，sweet爆燈：「佢仲花咗一個月時間用乾花摺咗份禮物，好有心思，今年雖然冇拖拍，都唔會悶，希望陪家人。」Ashina則高呼勁dry，希望盡快找到男友：「我憧憬將來嘅男友會畀驚喜我，扮同我嗌交，之後執衫趕我走，原來係幫我拖篋去機場，跟住同我去旅行過白色聖誕！」

攝：鄭家俊、吳文聰

崔碧珈場地：麗星郵輪處女星號

郭奕芯場地：SE7EN

文：影視組