Mandy Lieu證有餡 停工安胎
混血名模Mandy Lieu與太陽娛樂集團老闆周焯華的戀情轟動全城，昨日更驚爆Mandy懷有「華種」，其經理人Marie受訪時證實她的確懷有身孕，並透露她現時心情複雜，情緒低落，有感前路茫茫，故現時已全面停工靜養！
名模Mandy入行多年，年初終於升呢成為模特兒公司老闆之一，打算在模界闖一番事業，8月Mandy更在活動上承認與太陽娛樂集團老闆周焯華（洗米華）「發展中」，二人隨即愈愛愈高調，成為傳媒追訪對象，洗米華對Mandy亦甚為闊綽，大手筆送上近億豪宅，絕不手軟。與此同時，洗米華太太陳慧玲亦開始發功，不時在網上大晒恩愛，被老公「包起」飛到歐洲慶祝生日，兩女「鬥法」升級。
近月潛水行蹤成謎
不過，早前突然傳出Mandy暈倒家中，友人擔心報警，警方破門而入，幸好虛驚一場。自此Mandy行蹤成謎，一直潛水，反而跟洗米華育有一女的陳慧玲就繼續高調，早前更被拍得肚凸凸逛童裝店，傳出再度懷孕。在報道刊登的同日晚上，洗米華高調地拖着肚凸凸的正印太太現身慈善活動，用行動證明其地位，而巧合地另一邊廂，Mandy幾乎是同一時間竟又戲劇性被發現現身養和醫院，並大呼肚痛，期間又摸肚掩嘴欲吐，狀甚不適，令人有所猜疑。故事昨日再有驚人發展，消息指Mandy已懷有四個半月B女，預產期為明年五月，現時返回老家馬來西亞安胎，記者致電Mandy求證懷孕一事，她未有回覆，而其經理人Marie就證實Mandy有喜，事件認真峰迴路轉！
傳懷B女四個半月
昨日記者致電Marie，向她求證Mandy懷有「華B」一事？她默認說：「我唔否認，遲啲你哋咪清楚，總之佢依家已經全面停晒啲工作休息，一路唔會開工。（佢返馬來西亞安胎？）佢唔喺香港，但喺邊度我真係唔知，（咁係咪B女？）我唔知，（咁Mandy有咩打算？）係有咗都會生啦，冇理由唔要，呢個係責任，Mandy一定會承擔，（喺計劃之中？）應該唔係啦，佢依家先29歲，仲後生。」Marie表示Mandy現時心情相當複雜，情緒亦十分低落，畢竟自己身份未明，着實感到前路茫茫，畢竟她現在也很被動。Marie又指事件令Mandy受到打擊，希望大家給予她空間和時間，好讓她可以好好思考未來的路，她也感激傳媒對她的關心。
文：名人組