張家瑩難妁忘約仔倒數失散
佳節將臨，兩位單身亞姐張家瑩及周嘉莉相約一齊擦聖誕大餐，以美食填飽冇拖拍的空虛，兩人對海鮮拼盤情有獨鍾。家瑩更表示難忘初戀的聖誕，當時約男友在平安夜去海旁倒數，怎料太逼人，會合唔到男友，竟與不相識的人一齊倒數！
亞姐張家瑩及周嘉莉提早慶祝聖誕，相約到位於中環的西班牙餐廳豪擦香辣烚海鮮拼盤、帶子八爪魚沙律、西班牙黑毛豬及秘製肉眼扒等美食，兩人雀躍地拿起海鮮揮舞，家瑩更將大蟹放在嘉莉頭上扮頭飾，認真搞笑！
問到最難忘的聖誕節，家瑩回憶起十多歲時初戀的搞笑事，她說：「當晚平安夜發生過啲蝦碌嘢，我瞞住父母，食埋飯先出得街，之後趕去海旁倒數，點知太逼人，會合唔到男友，倒數時就同啲唔識嘅人逼住過，感覺幾特別，到真係同男友見面時我哋都爆喊，好在之後都玩得好開心！」
恨有伴過聖誕
家瑩及嘉莉現時同屬單身，問到是否憧憬浪漫聖誕？她們即唉聲嘆氣，嘉莉說：「過去嘅廿三個聖誕節都係單身！今年想有個人陪，我好想拍拖呀！希望搵到個陪去嘉年華，玩吓摩天輪、過山車，簡簡單單就好開心！」家瑩亦希望可盡快找到另一半：「唔知會唔會平安夜遇到個男仔，咁就可以一齊過聖誕！自己最想係拍住拖去落雪地方溜冰過聖誕，好浪漫！」
最愛西班牙菜
今年榮升食肆老闆娘的家瑩對飲食相當講究，她大讚枱上的海鮮夠新鮮，嘉莉則對肉眼扒情有獨鍾，家瑩說：「我鍾意食西班牙菜，尤其係海鮮！今年都會約一班人過聖誕，一齊玩吓。」嘉莉則笑言每年都會到家瑩的派對「黐餐」：「因為佢家庭好多人，好溫馨，希望今年家瑩都會收留我啦！」
攝影：吳文聰
場地：PEZ HKC
文：立影