徐濠縈(舌累)陪玩 捱Eason鬧

徐濠縈、模特兒莊思敏、藝人周秀娜、潮流達人黃偉文等前晚出席聖誕聯歡活動，徐濠縈透露由於渣打馬拉松提早至一月尾舉行，故她會在聖誕期間留港練跑，之後還要參加東京馬拉松，她說：「我個女有啲失望，因為每年聖誕都喺日本過，都要補償吓畀佢。」

莊思敏入股賣包

提到Eason在《MAMA頒獎禮》中演繹代表作《浮誇》技驚四座被指為港歌手爭光，她笑言：「佢鬧我前一晚要佢去蘇永康嗰度玩，我叫佢陪我去，佢本來話唔去，因為第二日要做嘢，我話你唔陪我去，又畀記者話我一個人去玩。你知佢去得就唔會即刻走，玩到凌晨四點幾，第二日完全講唔到嘢，有啲失聲，佢好忟，加上佢經常做巡迴，又有壞習慣，所以把聲好弱，佢知道自己狀態唔係最好，但估唔到出來反應咁好。（你以佢為傲？）一向都係，尤其係個女。」

最近公司結業的莊思敏，指已入股朋友餐廳。

娜姐腳踏高跟，擔心攝落地板罅，笑言希望有男仔傍實。

而莊思敏透露已很久未有現身公開活動，還大呻聖誕及除夕未試過冇工開，記者笑指是否被公司雪藏而不知情，她即說：「唔會啩！」另她有份投資的化妝學校及經理人公司結業，收入大減：「今年幾破財，我新年真係要去求財。」問她可會再接再厲做生意？她坦言會投資飲食業：「我搵咗間有信譽嘅餐廳入股，所以好有信心。（投資幾多？）好少，只係參與吓，佢哋做得好好，我逼佢地畀我入股，我答應得閒幫佢哋賣麵包，聖誕冇嘢做咪去賣下麵包囉！」

娜姐呻難搵男友

因現場地板有罅，高跟鞋鞋跟容易「攝」入去，周秀娜笑言着錯鞋：「好在我有練泰拳，身手敏捷，如果呢個時候有個男仔喺側邊就好，但得番半個月都好難搵到。」談到是否有意在港置業，她坦言一直想買樓，但可能在馬來西亞或內地：「香港就租住先，因為樓價太貴。（香港有冇心儀嘅地方？）仲未有，睇定啲先。（預過千萬？）依家香港嘅樓有番咁上下呎數都要呢個價，惟有下年再努力啲工作。」

文：名人組